یہ کیا کہ ان کے دل کو نہ زنہار توڑیئے

یہ کیا کہ ان کے دل کو نہ زنہار توڑیئے

سو بار جا کے جوڑئیے سو بار توڑیئے

آؤ نہ مل کے بیٹھے ہیں بے شغل ہم سو کیوں

کٹ کیجے ان سے یاری اب اے یار توڑیئے

ہاتھ آوے کچھ اگر نہ سرشتہ بگاڑ کا

تو لڑ کے ان کی موتیوں کا ہار توڑیئے

یا چھیڑ چھاڑ کے لیے اک سنگ فرش سے

دس پانچ ان کے رخنۂ دیوار توڑیئے

یا لال چوری ڈالیوں کو توڑ تاڑ پر

رغبت سے ایک غنچۂ گلنار توڑیئے

شوخی تو دیکھو آج یہی قصد ہے کہ خیر

جس ڈھب سے ہووے خاطر دل دار توڑیئے

وہ کچھ کہیں پر اپنی ہے بس گائے جائیے

اور تان ادھر کو کوئی طرح دار توڑیئے

یا کود پھاند چول بھی ان کے پلنگ کے

بس ہو کے لڑنے بھڑنے کو تیار توڑیئے

پھول ان کی کیاریوں سے کسی اور روپ کا

کچھ کر کے بات چیت کے تکرار توڑیئے

سبزے کو روند ڈالئے یا ان کے باغ کے

نارنگیاں ہی چپکے سے دو چار توڑیئے

انشاؔ یہ روٹھ راٹھ ہی اک تاؤ بھاؤ کے

اس توڑ جوڑ کا نہ کبھی تار توڑیئے

ye kya ke un ke dil ko na zinhar toriye

sau bar ja ke joriye sau bar toriye

ao na mil ke baithe hain be shaghl ham so kyun

kat kije un se yari ab ai yar toriye

hath awe kuchh agar na sarishta bigar ka

tu lar ke un ki motiyon ka har toriye

ya chher chhar ke liye ik sang farsh se

das panch un ke rakhna-e-diwar toriye

ya lal chori daliyon ko tor tar par

raghbat se ek ghuncha-e-gulnar toriye

shokhi to dekho aj yahi qasd hai ke khair

jis dhab se howe khatir dil dar toriye

wo kuchh kahin par apni hai bas gae jaiye

aur tan idhar ko koi tarah dar toriye

ya kud phand chul bhi un ke palang ke

bas ho ke larne bhirne ko tayyar toriye

phul un ki kiyariyon se kisi aur rup ka

kuchh kar ke bat chet ke takrar toriye

sabze ko raund daliye ya un ke bagh ke

narangiyan hi chupke se do char toriye

insha ye ruth ratha hi ik tao bhao ke

is tor jor ka na kabhi tar toriye