یاں سے پیغام جو لے کر گئے معقول گئے

یاں سے پیغام جو لے کر گئے معقول گئے

اس کی باتوں میں لگے ایسے کہ سب بھول گئے

تو تو معشوق ہے تجھ کو تو بہت عاشق ہیں

غم انہوں کا ہے جو وہ جان سے نرمول گئے

بے کلی اپنی کا اظہار تو کرتا نہیں میں

گل رخاں دیکھ کے تم مجھ کو عبث بھول گئے

کیونکہ کھٹکا نہ رہے سب کو ادھر جانے کا

آہ کیا کیا نہ اسی خاک میں مقبول گئے

اپنی نیکی و بدی چھوڑ گئے دنیا میں

گرچہ دونوں نہ رہے قاتل و مقتول گئے

زلف میں اس کی بہت رہ کے نہ اترائیو دل

مجھ سے کتنے ہی مری جان یہاں جھول گئے

پہلی باتوں کا محبت کی حسنؔ ذکر نہ کر

بس وہ دستور گئے اور وہ معمول گئے

yan se paigham jo le kar gae maaqul gae

us ki baton mein lage aise ke sab bhul gae

tu to maashuq hai tujh ko to bahut ashiq hain

gham unhon ka hai jo wo jan se nirmol gae

be kali apni ka izhar to karta nahin main

gul rukhan dekh ke tum mujh ko abas bhul gae

kyunke khatka na rahe sab ko idhar jane ka

ah kya kya na isi khak mein maqbul gae

apni neki-o-badi chhor gae duniya mein

garche donon na rahe qatil-o-maqtul gae

zulf mein us ki bahut rah ke na utraiyo dil

mujh se kitne hi miri jan yahan jhul gae

pahli baton ka mohabbat ki husn zikr na kar

bas wo dastur gae aur wo maamul gae