آدم کا جسم جب کہ عناصر سے مل بنا

آدم کا جسم جب کہ عناصر سے مل بنا

کچھ آگ بچ رہی تھی سو عاشق کا دل بنا

سرگرم نالہ ان دنوں میں بھی ہوں عندلیب

مت آشیاں چمن میں مرے متصل بنا

جب تیشہ کوہ کن نے لیا ہاتھ تب یہ عشق

بولا کہ اپنی چھاتی پہ دھرنے کو سل بنا

جس تیرگی سے روز ہے عشاق کا سیاہ

شاید اسی سے چہرۂ خوباں پہ تل بنا

لب زندگی میں کب ملے اس لب سے اے کلال

ساغر ہماری خاک کو متھ کرکے گل بنا

اپنا ہنر دکھاویں گے ہم تجھ کو شیشہ گر

ٹوٹا ہوا کسی کا اگر ہم سے دل بنا

سن سن کے عرض حال مرا یار نے کہا

سوداؔ نہ باتیں بیٹھ کے یاں متصل بنا

adam ka jism jab ke anasir se mil bana

kuchh ag bach rahi thi so ashiq ka dil bana

sargarm-e-nala in dinon mein bhi hun andalib

mat ashiyan chaman mein mire muttasil bana

jab tesha koh kin ne liya hath tab ye ishq

bola ke apni chhati pe dharne ko sil bana

jis tirgi se roz hai ushshaq ka siyah

shayad usi se chehra-e-khuban pe til bana

lab zindagi mein kab mile us lab se ai kalal

saghar hamari khak ko mith karke gul bana

apna hunar dikhawenge ham tujh ko shisha gar

tuta hua kisi ka agar ham se dil bana

sun sun ke arz-e-hal mira yar ne kaha

sauda na baten baith ke yan muttasil bana