ہمت مرداں

نئی تہذیب نے برباد غارت کر دیا بالکل

ہم اپنے ملک سے اب اس کو غارت کر کے چھوڑیں گے

ہمارے علم و فن سب اس نے رخصت کر دیے ہم سے

ہم اب ہندوستاں سے اس کو رخصت کر کے چھوڑیں گے

غلامی نے ہمارے سارے جوہر خاک کر ڈالے

ہم اپنے ملک سے دور اب یہ لعنت کر کے چھوڑیں گے

ہم اپنے ملک پر قبضہ کریں گے جس طرح ہوگا

زبان بے کسی سے ختم حجت کر کے چھوڑیں گے

فنا کر دیں گے اہل جبر و استبداد کی ہستی

زمیں میں دفن رسم جہل و وحشت کر کے چھوڑیں گے

مٹا ڈالیں گے ہم ہر خود سر و مغرور کا غرہ

تہ و بالا نظام کبر و نخوت کر کے چھوڑیں گے

ہٹا دیں گے ہر اک سنگ گراں کو اپنے رستے سے

نمایاں اپنی شان استقامت کر کے چھوڑیں گے

اگر کوہ گراں بھی ہوگا اپنی راہ میں حائل

اسے بھی پائمال عزم و ہمت کر کے چھوڑیں گے

غرض اب یہ تہیہ کر لیا ہے مستقل ہم نے

فنا اک دن یہ طاغوتی حکومت کر کے چھوڑیں گے

nai tahzib ne barbad gharat kar diya bilkul

ham apne mulk se ab us ko gharat kar ke chhorenge

hamare ilm-o-fan sab us ne rukhsat kar diye ham se

ham ab hindostan se us ko rukhsat kar ke chhorenge

ghulami ne hamare sare jauhar khak kar dale

ham apne mulk se dur ab ye laanat kar ke chhorenge

ham apne mulk par qabza karenge jis tarah hoga

zaban-e-be kisi se khatm hujjat kar ke chhorenge

fana kar denge ahl-e-jabr-o-istibdad ki hasti

zamin mein dafn rasm-e-jahl-o-wahshat kar ke chhorenge

mita dalenge ham har khud sar-o-maghrur ka ghurra

tah-o-bala nizam-e-kibr-o-nakhwat kar ke chhorenge

hata denge har ik sang-e-giran ko apne raste se

numayan apni shan-e-istiqamat kar ke chhorenge

agar koh-e-giran bhi hoga apni rah mein hail

use bhi paimal-e-azm-o-himmat kar ke chhorenge

gharaz ab ye tahye kar liya hai mustaqil ham ne

fana ik din ye taghuti hukumat kar ke chhorenge