ہمالہ

اے ہمالہ! اے فصیلِ کشورِ ہندوستاں

چُومتا ہے تیری پیشانی کو جھُک کر آسماں

تجھ میں کُچھ پیدا نہیں دیرینہ روزی کے نشاں

تُو جواں ہے گردشِ شام و سحَر کے درمیاں

ایک جلوہ تھا کلیمِ طُورِ سینا کے لیے

تُو تجلّی ہے سراپا چشمِ بینا کے لیے

امتحانِ دیدۂ ظاہر میں کوہستاں ہے تُو

پاسباں اپنا ہے تو، دیوارِ ہندُستاں ہے تُو

سُوئے خلوت گاہِ دل دامن کشِ انساں ہے تُو

برف نے باندھی ہے دستارِ فضیلت تیرے سر

خندہ زن ہے جو کُلاہِ مہرِ عالم تاب پر

تیری عمرِ رفتہ کی اک آن ہے عہدِ کُہن

وادیوں میں ہیں تری کالی گھٹائیں خیمہ زن

چوٹیاں تیری ثریّا سے ہیں سرگرمِ سخن

تُو زمیں پر اور پہنائے فلک تیرا وطن

چشمۂ دامن ترا آئینۂ سیّال ہے

دامنِ موجِ ہوا جس کے لیے رُومال ہے

ابر کے ہاتھوں میں رہوارِ ہوا کے واسطے

تازیانہ دے دیا برقِ سرِ کُہسار نے

اے ہمالہ کوئی بازی گاہ ہے تُو بھی، جسے

دستِ قُدرت نے بنایا ہے عناصِر کے لیے

ہائے کیا فرطِ طرب میں جھُومتا جاتا ہے ابر

فیلِ بے زنجیر کی صُورت اُڑا جاتا ہے ابر

جُنبشِ موجِ نسیمِ صبح گہوارہ بنی

جھُومتی ہے نشّۂ ہستی میں ہر گُل کی کلی

یوں زبانِ برگ سے گویا ہے اس کی خامشی

دستِ گُلچیں کی جھٹک مَیں نے نہیں دیکھی کبھی

کہہ رہی ہے میری خاموشی ہی افسانہ مرا

کُنجِ خلوت خانۂ قُدرت ہے کاشانہ مرا

آتی ہے ندّی فرازِ کوہ سے گاتی ہوئی

کوثر و تسنیم کی موجوں کو شرماتی ہوئی

آئنہ سا شاہدِ قُدرت کو دِکھلاتی ہوئی

سنگِ رہ سے گاہ بچتی گاہ ٹکراتی ہوئی

چھیڑتی جا اس عراقِ دل نشیں کے ساز کو

اے مُسافر دل سمجھتا ہے تری آواز کو

لیلیِ شب کھولتی ہے آ کے جب زُلفِ رسا

دامنِ دل کھینچتی ہے آبشاروں کی صدا

وہ خموشی شام کی جس پر تکلّم ہو فدا

وہ درختوں پر تفکّر کا سماں چھایا ہُوا

کانپتا پھرتا ہے کیا رنگِ شفَق کُہسار پر

خوشنما لگتا ہے یہ غازہ ترے رُخسار پر

اے ہمالہ! داستاں اُس وقت کی کوئی سُنا

مسکنِ آبائے انساں جب بنا دامن ترا

کچھ بتا اُس سیدھی سادی زندگی کا ماجرا

داغ جس پر غازۂ رنگِ تکلّف کا نہ تھا

ہاں دکھا دے اے تصوّر پھر وہ صبح و شام تُو

دوڑ پیچھے کی طرف اے گردشِ ایّام تُو

ai himala! ai fasil-e-kishwar-e-hindostan

chumta hai teri peshani ko jhuk kar asman

tujh mein kuchh paida nahin derina rozi ke nishan

tu jawan hai gardish-e-sham-o-sahar ke darmiyan

ek jalwa tha kalim-e-tur-e-sina ke liye

tu tajalli hai sarapa chashm-e-bina ke liye

imtihan-e-dida-e-zahir mein kohistan hai tu

pasban apna hai to, diwar-e-hindsitan hai tu

su-e-khalwat gah-e-dil daman kash-e-insan hai tu

barf ne bandhi hai dastar-e-fazilat tere sar

khanda zan hai jo kulah-e-mehr-e-alam tab par

teri umr-e-rafta ki ik an hai ahd-e-kuhan

wadiyon mein hain tiri kali ghataen khema zan

chotiyan teri surayya se hain sargarm-e-sukhan

tu zamin par aur pahnae falak tera watan

chashma-e-daman tira aina-e-sayyal hai

daman-e-mauj-e-hawa jis ke liye rumal hai

abr ke hathon mein rahwar-e-hawa ke waste

taziyana de diya barq-e-sar-e-kohsar ne

ai himala koi bazi gah hai tu bhi, jise

dast-e-qudrat ne banaya hai anasir ke liye

hae kya fart-e-tarab mein jhumta jata hai abr

fel-e-be zanjir ki surat ura jata hai abr

jumbish-e-mauj-e-nasim-e-subh gahwara bani

jhumti hai nasha-e-hasti mein har gul ki kali

yun zaban-e-barg se goya hai us ki khamushi

dast-e-gulchin ki jhatak main ne nahin dekhi kabhi

kah rahi hai meri khamoshi hi afsana mira

kunj-e-khalwat khana-e-qudrat hai kashana mira

ati hai naddi faraz-e-koh se gati hui

kausar-o-tasnim ki maujon ko sharmati hui

aina sa shahid-e-qudrat ko dikhlati hui

sang-e-rah se gah bachti gah takrati hui

chherti ja is iraq-e-dil nashin ke saz ko

ai musafir dil samajhta hai tiri awaz ko

laila-e-shab kholti hai a ke jab zulf-e-rasa

daman-e-dil khinchti hai absharon ki sada

wo khamoshi sham ki jis par takallum ho fida

wo darakhton par tafakkur ka saman chhaya hua

kanpta phirta hai kya rang-e-shafaq kohsar par

khushnuma lagta hai ye ghaza tire rukhsar par

ai himala! dastan us waqt ki koi suna

maskan-e-aba-e-insan jab bana daman tira

kuchh bata us sidhi sadi zindagi ka majra

dagh jis par ghaza-e-rang-e-takalluf ka na tha

han dikha de ai tasawwur phir wo subh-o-sham tu

daur pichhe ki taraf ai gardish-e-ayyam tu