ہاتھ سے ہیہات کیا جاتا رہا

ہاتھ سے ہیہات کیا جاتا رہا

مرنے جینے کا مزا جاتا رہا

زندگی کا آسرا جاتا رہا

ہائے جینے کا مزا جاتا رہا

لے گیا سرمایۂ صبر و قرار

مایہ دار اب صبر کا جاتا رہا

عمر بھر کی سب کمائی لٹ گئی

زیست کا برگ و نوا جاتا رہا

دل اگر باقی رہا کس کام کا

چین دل کا اے خدا جاتا رہا

زندگانی کی حلاوت اٹھ گئی

دانہ پانی کا مزا جاتا رہا

جو سہارا تھا دم درماندگی

وہ بڑھاپے کا عصا جاتا رہا

کیجیے کس بات کی اب آرزو

آرزو کا مدعا جاتا رہا

گل ہوا اپنا چراغ آرزو

نور گھر کا اے خدا جاتا رہا

ہائے کیسا لٹ گیا باغ مراد

کیا شجر پھولا پھلا جاتا رہا

روئیے کیا زندگانی کو ظہیرؔ

موت کا بھی اب مزا جاتا رہا

hath se hehat kya jata raha

marne jine ka maza jata raha

zindagi ka asra jata raha

hae jine ka maza jata raha

le gaya sarmaya-e-sabr-o-qarar

maya dar ab sabr ka jata raha

umr bhar ki sab kamai lut gai

zist ka barg-o-nawa jata raha

dil agar baqi raha kis kam ka

chain dil ka ai khuda jata raha

zindagani ki halawat uth gai

dana pani ka maza jata raha

jo sahara tha dam-e-darmandagi

wo burhape ka asa jata raha

kijiye kis bat ki ab arzu

arzu ka muddaa jata raha

gul hua apna charagh-e-arzu

nur ghar ka ai khuda jata raha

hae kaisa lut gaya bagh-e-murad

kya shajar phula phala jata raha

roiye kya zindagani ko zahir

maut ka bhi ab maza jata raha