گلے لگائیں کریں پیار تم کو عید کے دن

گلے لگائیں کریں پیار تم کو عید کے دن

ادھر تو آؤ مرے گلعذار عید کے دن

غضب کا حسن ہے آرائشیں قیامت کی

عیاں ہے قدرت پروردگار عید کے دن

سنبھل سکی نہ طبیعت کسی طرح میری

رہا نہ دل پہ مجھے اختیار عید کے دن

وہ سال بھر سے کدورت بھری جو تھی دل میں

وہ دور ہو گئی بس ایک بار عید کے دن

لگا لیا انہیں سینہ سے جوش الفت میں

غرض کہ آ ہی گیا مجھ کو پیار عید کے دن

کہیں ہے نغمۂ بلبل کہیں ہے خندۂ گل

عیاں ہے جوش شباب بہار عید کے دن

سویاں دودھ شکر میوہ سب مہیا ہے

مگر یہ سب ہے مجھے ناگوار عید کے دن

ملے اگر لب شیریں کا تیرے اک بوسہ

تو لطف ہو مجھے البتہ یار عید کے دن

gale lagaen karen pyar tum ko eid ke din

idhar to ao mire gulizar eid ke din

ghazab ka husn hai araishen qayamat ki

ayan hai qudrat-e-parwardigar eid ke din

sambhal saki na tabiat kisi tarah meri

raha na dil pe mujhe ikhtiyar eid ke din

wo sal bhar se kudurat bhari jo thi dil mein

wo dur ho gai bas ek bar eid ke din

laga liya unhen sina se josh-e-ulfat mein

gharaz ke a hi gaya mujh ko pyar eid ke din

kahin hai naghma-e-bulbul kahin hai khanda-e-gul

ayan hai josh-e-shabab-e-bahar eid ke din

siwiyan dudh shukr mewa sab mahiya hai

magar ye sab hai mujhe nagawar eid ke din

mile agar lab-e-shirin ka tere ik bosa

tu lutf ho mujhe albuta yar eid ke din