گر میرے بت ہوش ربا کو نہیں دیکھا

گر میرے بت ہوش ربا کو نہیں دیکھا

اس دیکھنے والے نے خدا کو نہیں دیکھا

رہبر سے غرض کیا ہے جو منزل نظر آئے

کعبے میں کہے قبلہ نما کو نہیں دیکھا

جس شکل سے ہنستے ہیں مرے حال پہ احباب

روتے ہوئے یوں اہل عزا کو نہیں دیکھا

اتنا تو بتا دے مجھے اے ناصح مشفق

دیکھا ہے کہ اس ماہ لقا کو نہیں دیکھا

جب داغؔ کو ڈھونڈھا کسی بت خانے میں پایا

گھر میں کبھی اس مرد خدا کو نہیں دیکھا

gar mere but hosh ruba ko nahin dekha

is dekhne wale ne khuda ko nahin dekha

rahbar se gharaz kya hai jo manzil nazar ae

kaabe mein kahe qibla numa ko nahin dekha

jis shakl se hanste hain mire hal pe ahbab

rote hue yun ahl-e-aza ko nahin dekha

itna to bata de mujhe ai naseh-e-mushfiq

dekha hai ke us mah liqa ko nahin dekha

jab dagh ko dhundha kisi but khane mein paya

ghar mein kabhi is mard-e-khuda ko nahin dekha