گالیاں تنخواہ ٹھہری ہے اگر بٹ جائے گی

گالیاں تنخواہ ٹھہری ہے اگر بٹ جائے گی

عاشقوں کے گھر مٹھائی لب شکر بٹ جائے گی

روبرو گر ہوگا یوسف اور تو آ جائے گا

اس کی جانب سے زلیخا کی نظر بٹ جائے گی

رہزنوں میں ناز و غمزہ کی یہ جنس دین و دل

جوں متاع بردہ آخر ہم دگر بٹ جائے گی

ہوگا کیا گر بول اٹھے غیر باتوں میں مری

پھر طبیعت میری اے بیداد گر بٹ جائے گی

دولت دنیا نہیں جانے کی ہرگز تیرے ساتھ

بعد تیرے سب یہیں اے بے خبر بٹ جائے گی

کر لے اے دل جان کو بھی رنج و غم میں تو شریک

یہ جو محنت تجھ پہ ہے کچھ کچھ مگر بٹ جائے گی

مونگ چھاتی پہ جو دلتے ہیں کسی کی دیکھنا

جوتیوں میں دال ان کی اے ظفرؔ بٹ جائے گی

galiyan tankhwah thahri hai agar bat jaegi

ashiqon ke ghar mithai lab shakar bat jaegi

rubaru gar hoga yusuf aur to a jaega

us ki janib se zulekha ki nazar bat jaegi

rahzanon mein naz-o-ghamza ki ye jins-e-din-o-dil

jun mata-e-barda akhir ham digar bat jaegi

hoga kya gar bol uthe ghair baton mein miri

phir tabiat meri ai bedad gar bat jaegi

daulat-e-duniya nahin jane ki hargiz tere sath

baad tere sab yahin ai be khabar bat jaegi

kar le ai dil jan ko bhi ranj-o-gham mein to sharik

ye jo mehnat tujh pe hai kuchh kuchh magar bat jaegi

mung chhati pe jo dalte hain kisi ki dekhna

jutiyon mein dal un ki ai zafar bat jaegi