گدا دست اہل کرم دیکھتے ہیں

گدا دست اہل کرم دیکھتے ہیں

ہم اپنا ہی دم اور قدم دیکھتے ہیں

نہ دیکھا جو کچھ جام میں جم نے اپنے

سو یک قطرۂ مے میں ہم دیکھتے ہیں

یہ رنجش میں ہم کو ہے بے اختیاری

تجھے تیری کھا کر قسم دیکھتے ہیں

غرض کفر سے کچھ نہ دیں سے ہے مطلب

تماشائے دیر و حرم دیکھتے ہیں

حباب لب جو ہیں اے باغباں ہم

چمن کو ترے کوئی دم دیکھتے ہیں

نوشتے کو میرے مٹاتے ہیں رو رو

ملائک جو لوح و قلم دیکھتے ہیں

مٹا جائے ہے حرف حرف آنسوؤں سے

جو نامہ اسے کر رقم دیکھتے ہیں

اکڑ سے نہیں کام سنبل کی ہم کو

کسی زلف کا پیچ و خم دیکھتے ہیں

خدا دشمنوں کو نہ وہ کچھ دکھائے

جو کچھ دوست سے اپنے ہم دیکھتے ہیں

ستم سے کیا تو نے ہم کو جو خوگر

کرم سے ترے ہم ستم دیکھتے ہیں

مگر تجھ سے رنجیدہ خاطر ہے سوداؔ

اسے تیرے کوچے میں کم دیکھتے ہیں

gada dast-e-ahl-e-karam dekhte hain

ham apna hi dam aur qadam dekhte hain

na dekha jo kuchh jam mein jam ne apne

so yak qatra-e-mai mein ham dekhte hain

ye ranjish mein ham ko hai be ikhtiyari

tujhe teri kha kar qasam dekhte hain

gharaz kufr se kuchh na den se hai matlab

tamasha-e-dair-o-haram dekhte hain

habab-e-lab jo hain ai baghban ham

chaman ko tire koi dam dekhte hain

naushite ko mere mitate hain ro ro

mulaik jo lauh-o-qalam dekhte hain

mita jae hai harf harf ansuon se

jo nama use kar raqam dekhte hain

akkar se nahin kam sumbul ki ham ko

kisi zulf ka pech-o-kham dekhte hain

khuda dushmanon ko na wo kuchh dikhae

jo kuchh dost se apne ham dekhte hain

sitam se kiya tu ne ham ko jo khugar

karam se tire ham sitam dekhte hain

magar tujh se ranjida khatir hai sauda

use tere kuche mein kam dekhte hain