گر کیجئے انصاف تو کی زور وفا میں

گر کیجئے انصاف تو کی زور وفا میں

خط آتے ہی سب چل گئے اب آپ ہیں یا میں

تم جن کی ثنا کرتے ہو کیا بات ہے ان کی

لیکن ٹک ادھر دیکھیو اے یار بھلا میں

رکھتا ہے کچھ ایسی وہ برہمن بچہ رفتار

بت ہو گیا دھج دیکھ کے جس کی بہ خدا میں

یارو نہ بندھی اس سے کبھو شکل ملاقات

ملنے کو تو اس شوخ کے ترسا ہی کیا میں

جب میں گیا اس کے تو اسے گھر میں نہ پایا

آیا وہ اگر میرے تو در خود نہ رہا میں

کیفیت چشم اس کی مجھے یاد ہے سوداؔ

ساغر کو مرے ہاتھ سے لیجو کہ چلا میں

gar kijiye insaf to ki zor wafa mein

khat ate hi sab chal gae ab ap hain ya main

tum jin ki sana karte ho kya bat hai un ki

lekin tuk idhar dekhiyo ai yar bhala mein

rakhta hai kuchh aisi wo barahman bachcha raftar

but ho gaya dhaj dekh ke jis ki ba khuda mein

yaro na bandhi us se kabhu shakl-e-mulaqat

milne ko to us shokh ke tarsa hi kiya main

jab main gaya us ke to use ghar mein na paya

aya wo agar mere to dar khud na raha main

kaifiyat chashm us ki mujhe yad hai sauda

saghar ko mire hath se lijo ke chala mein