کب بات ہو بغیر خوشامد وہاں درست

کب بات ہو بغیر خوشامد وہاں درست

وہ نادرست بھی جو کہیں کہیے ہاں درست

تھوڑے سے دن بہار کے ہیں کس امید پر

کرتے ہیں اپنے مرغ چمن آشیاں درست

کچھ میں بھی اپنا حال طبیعت بیاں کروں

گر ہو مزاج آپ کا اے مہرباں درست

اس کو درستی دل عاشق سے کیا غرض

جس بد زبان کی نہیں اب تک زباں درست

آنکھوں میں رہ کہ دل میں ٹھہر تیرے واسطے

آراستہ ہر ایک مکاں ہر مکاں درست

ہر روز تازیانہ زلف دراز سے

تو نے بھی دل کو خوب کیا میری جاں درست

آتا ہے سامنے جو وہ غارت گر شکیب

اوسان داغؔ رہتے ہیں اپنے کہاں درست

kab bat ho baghair khushamad wahan durust

wo nadurust bhi jo kahin kahiye han durust

thore se din bahar ke hain kis umid par

karte hain apne murgh-e-chaman ashiyan durust

kuchh main bhi apna hal-e-tabiat bayan karun

gar ho mizaj ap ka ai mehrban durust

us ko durusti dil-e-ashiq se kya gharaz

jis bad zaban ki nahin ab tak zaban durust

ankhon mein rah ke dil mein thahar tere waste

arasta har ek makan har makan durust

har roz taziyana zulf-e-daraz se

tu ne bhi dil ko khub kiya meri jan durust

ata hai samne jo wo gharat gar-e-shakeb

ausan dagh rahte hain apne kahan durust