کانپور

یہ مقناطیس کی دعوت تھی آہن کیسے رد کرتا

میں کلکتہ سے رخصت ہو کے سیدھا کانپور آیا

نظر آئے رضاکاران نیلی پوش صف در صف

مرے دل میں سرور اترا مری آنکھوں میں نور آیا

سنائی داستاں لاہور اور اس کے شہیدوں کی

تو میری پیشوائی کے لئے شور نشور آیا

سیہ مستی کی دیتا ہوں صلا رندان مشرق کو

خمستان عرب کے نشہ میں ہو کر میں چور آیا

کیا افسانہ دنیا کا سپرد خامہ جب میں نے

تو افسوں دین قیم کا نظر بین السطور آیا

مسلمانوں کی جمعیت سے ٹکرانا نہیں آساں

وہ ٹکرائیں تو سمجھو ان کی عقلوں میں فتور آیا

خدا کی حمد پیغمبر کی مدح اسلام کے قصے

مرے مضموں میں جب سے شعر کہنے کا شعور آیا

ye miqnatis ki daawat thi ahan kaise rad karta

main kilktah se rukhsat ho ke sidha kanpor aya

nazar ae razakaran-e-nili posh saf dar saf

mire dil mein surur utra miri ankhon mein nur aya

sunai dastan lahor aur us ke shahidon ki

tu meri peshwai ke liye shor-e-nushur aya

siyah masti ki deta hun sala rindan-e-mashriq ko

khumistan-e-arab ke nasha mein ho kar main chur aya

kiya afsana duniya ka supurd-e-khama jab main ne

tu afsun din qem ka nazar bain alssutur aya

musalmanon ki jamiyyat se takrana nahin asan

wo takraen to samjho un ki aqlon mein futur aya

khuda ki hamd paighambar ki madh islam ke qisse

mire mazmun mein jab se sher kahne ka shuur aya