پیمانے میں وہ زہر نہیں گھول رہے تھے

پیمانے میں وہ زہر نہیں گھول رہے تھے

میرے لئے میخانے کا در کھول رہے تھے

میں دیر میں چپ دور سے منہ دیکھ رہا تھا

کس طرح برے بول یہ بت بول رہے تھے

کرتے تھے وہ بیٹھے ہوئے ناخن سے جدا گوشت

کہنے کو مرے دل کی گرہ کھول رہے تھے

صیاد نے کب ناوک بیداد لگایا

ہم اڑنے کو جب شاخ سے پر تول رہے تھے

اے آنکھ در اشک وہی نزع میں کام آئے

بن کر ترے دامن میں جو انمول رہے تھے

ہم بیٹھے تھے کس طرح تہہ شاخ فسردہ

گل ہنستے تھے مرغان چمن بول رہے تھے

شوخی سے قیامت کو وہ پاسنگ بنا کر

ہم کتنے ہیں باتوں میں ہمیں تول رہے تھے

تھے صبح کو وہ ساغر جم دست گدا میں

آلودہ مے شب کو جو کشکول رہے تھے

کچھ چپ سے ہیں اب حشر میں آنے سے کسی کے

بڑھ بڑھ کے ریاضؔ آج بہت بول رہے تھے

paimane mein wo zahr nahin ghol rahe the

mere liye maikhane ka dar khol rahe the

main der mein chup dur se munh dekh raha tha

kis tarah bure bol ye but bol rahe the

karte the wo baithe hue nakhun se juda gosht

kahne ko mire dil ki girah khol rahe the

sayyad ne kab nawak-e-bedad lagaya

ham urne ko jab shakh se par tol rahe the

ai ankh dar-e-ashk wahi nazaa mein kam ae

ban kar tire daman mein jo anmol rahe the

ham baithe the kis tarah tah-e-shakh-e-fasurda

gul hanste the murghan-e-chaman bol rahe the

shokhi se qayamat ko wo pasang bana kar

ham kitne hain baton mein hamen tol rahe the

the subh ko wo saghar-e-jam dast-e-gada mein

aluda mai shab ko jo kashkol rahe the

kuchh chup se hain ab hashr mein ane se kisi ke

barh barh ke riyaz aj bahut bol rahe the