پیہم دیا پیالۂ مے برملا دیا

پیہم دیا پیالۂ مے برملا دیا

ساقی نے التفات کا دریا بہا دیا

اس حیلہ جو نے وصل کی شب ہم سے روٹھ کر

نیرنگ روزگار کا عالم دکھا دیا

اللہ ری بہار کی رنگ آفرینیاں

صحن چمن کو تختۂ جنت بنا دیا

اب وہ ہجوم شوق کی سرمستیاں کہاں

مایوسئ فراق نے دل ہی بجھا دیا

حسرتؔ یہ وہ غزل ہے جسے سن کے سب کہیں

مومنؔ سے اپنے رنگ کو تو نے ملا دیا

paiham diya pyala-e-mai barmala diya

saqi ne iltifat ka dariya baha diya

is hila jo ne wasl ki shab ham se ruth kar

nairang-e-rozgar ka alam dikha diya

allah ri bahar ki rang afriniyan

sehn-e-chaman ko takhta-e-jannat bana diya

ab wo hujum-e-shauq ki sarmastiyan kahan

mayusi-e-firaq ne dil hi bujha diya

hasrat ye wo ghazal hai jise sun ke sab kahin

momin se apne rang ko tu ne mila diya