پی لی ہم نے شراب پی لی

پی لی ہم نے شراب پی لی

تھی آگ مثال آب پی لی

اچھی پی لی خراب پی لی

جیسی پائی شراب پی لی

عادت سی ہے نشہ نہ اب کیف

پانی نہ پیا شراب پی لی

چھوڑے کئی دن گزر گئے تھے

آئی شب ماہتاب پی لی

منہ چوم لے کوئی اس ادا پہ

سرکا کے ذرا نقاب پی لی

منظور تھی شستگی زباں کی

تھوڑی سی شراب ناب پی لی

داڑھی کی نہیں ریاضؔ اب شرم

جب پا گئے بے حساب پی لی

pi li ham ne sharab pi li

thi ag misal-e-ab pi li

achchhi pi li kharab pi li

jaisi pai sharab pi li

adat si hai nasha na ab kaif

pani na piya sharab pi li

chhore kai din guzar gae the

ai shab-e-mahtab pi li

munh chum le koi is ada pe

sarka ke zara naqab pi li

manzur thi shustagi zaban ki

thori si sharab-e-nab pi li

darhi ki nahin riyaz ab sharm

jab pa gae be hisab pi li