پیا م صبح

اُجالا جب ہُوا رخصت جبینِ شب کی افشاں کا

نسیمِ زندگی پیغام لائی صبحِ خنداں کا

جگایا بُلبلِ رنگیں نوا کو آشیانے میں

کنارے کھیت کے شانہ ہِلایا اُس نے دہقاں کا

طلسمِ ظلمتِ شب سُورۂ والنُّور سے توڑا

اندھیرے میں اُڑایا تاجِ زر شمعِ شبستاں کا

پڑھا خوابیدگانِ دَیر پر افسونِ بیداری

برہمن کو دیا پیغام خورشیدِ دُرَخشاں کا

ہُوئی بامِ حرم پر آ کے یوں گویا مؤذّن سے

نہیں کھٹکا ترے دل میں نمودِ مہرِ تاباں کا؟

پُکاری اس طرح دیوارِ گلشن پر کھڑے ہو کر

چٹک او غنچہ گُل! تُو مؤذّن ہے گُلستاں کا

دیا یہ حکم صحرا میں چلو اے قافلے والو!

چمکنے کو ہے جُگنو بن کے ہر ذرّہ بیاباں کا

سوئے گورِ غریباں جب گئی زندوں کی بستی سے

تو یوں بولی نظارا دیکھ کر شہرِ خموشاں کا

ابھی آرام سے لیٹے رہو، مَیں پھر بھی آؤں گی

سُلادوں گی جہاں کو، خواب سے تم کو جگاؤں گی

ujala jab hua rukhsat jabin-e-shab ki afshan ka

nasim-e-zindagi paigham lai subh-e-khandan ka

jagaya bulbul-e-rangin nawa ko ashiyane mein

kinare khet ke shana hilaya us ne dehqan ka

tilism-e-zulmat-e-shab sura-e-walnur se tora

andhere mein uraya taj-e-zar sham-e-shabistan ka

parha khawabedgan-e-dair par afsun-e-bedari

barahman ko diya paigham khurshid-e-darakhshan ka

hui bam-e-haram par a ke yun goya muazzin se

nahin khatka tire dil mein numud-e-mehr-e-taban ka?

pukari is tarah diwar-e-gulshan par khare ho kar

chutak o ghuncha-e-gul! tu muazzin hai gulistan ka

diya ye hukm sahra mein chalo ai qafile walo!

chamakne ko hai jugnu ban ke har zarra bayaban ka

su-e-gor-e-ghariban jab gai zindon ki basti se

to yun boli nazara dekh kar shahr-e-khamoshan ka

abhi aram se lete raho, main phir bhi aungi

suladon gi jahan ko, khwab se tum ko jagaungi