Arooz is now on the App Store, for iPhone and iPad. Download →

All poetry

پوشیدہ جب ہو راز کہ منہ میں زباں نہ ہو

Dagh Dehlvi (1831–1905)

پوشیدہ جب ہو راز کہ منہ میں زباں نہ ہو

ہم بات بھی کریں تو بغیر از فغاں نہ ہو

لے جائیں آہ مجھ کو مری بدگمانیاں

ظالم وہاں کہ تیرا پتہ بھی جہاں نہ ہو

زاہد عذاب عشق صنم لطف حق سمجھ

یعنی عذاب ہم کو یہاں ہو وہاں نہ ہو

نیرنگی چمن جو مجھے یاد آ گئی

گل پر ہوا گمان کہ برگ خزاں نہ ہو

تم کو مزہ نہ دے گی کبھی داستان عشق

جب تک ہمارے منہ سے یہ قصہ بیاں نہ ہو

ناقہ کو قیس کیا نہ لگا لائے راہ پر

لیلی کا رازدار اگر سارباں نہ ہو

تہمت کسی کو ظلم کی اے داغؔ کیوں لگائیں

شکوہ بتوں سے کیا جو خدا مہرباں نہ ہو