پھول

تجھے کیوں فکر ہے اے گُل دلِ صد چاکِ بُلبل کی

تُو اپنے پیرہن کے چاک تو پہلے رفو کر لے

تمنّا آبرو کی ہو اگر گلزارِ ہستی میں

تو کانٹوں میں اُلجھ کر زندگی کرنے کی خو کر لے

صنوبر باغ میں آزاد بھی ہے، پا بہ گِل بھی ہے

اِنھی پابندیوں میں حاصل آزادی کو تُو کر لے

تنک بخشی کو اِستغنا سے پیغامِ خجالت دے

نہ رہ منّت کشِ شبنم، نِگُوں جام و سبو کر لے

نہیں یہ شانِ خودداری، چمن سے توڑ کر تجھ کو

کوئی دستار میں رکھ لے، کوئی زیبِ گلو کر لے

چمن میں غنچۂ گُل سے یہ کہہ کر اُڑ گئی شبنم

مذاقِ جَورِ گُلچیں ہو تو پیدا رنگ و بو کر لے

اگر منظور ہو تجھ کو خزاں ناآشنا رہنا

جہانِ رنگ و بو سے، پہلے قطعِ آرزو کر لے

اسی میں دیکھ، مُضمر ہے کمالِ زندگی تیرا

جو تجھ کو زینتِ دامن کوئی آئینہ رُو کر لے

tujhe kyun fikr hai ai gul dil-e-sad chak-e-bulbul ki

tu apne pairahan ke chak to pahle rafu kar le

tamanna abru ki ho agar gulzar-e-hasti mein

tu kanton mein ulajh kar zindagi karne ki khu kar le

sanobar bagh mein azad bhi hai, pa ba gil bhi hai

inhi pabandiyon mein hasil azadi ko tu kar le

tunuk bakhshi ko istighna se paigham-e-khijalat de

na rah minnat kash-e-shabnam, nigun jam-o-subu kar le

nahin ye shan-e-khuddari, chaman se tor kar tujh ko

koi dastar mein rakh le, koi zeb-e-galo kar le

chaman mein ghuncha-e-gul se ye kah kar ur gai shabnam

mazaq-e-jaur-e-gulchin ho to paida rang-o-bu kar le

agar manzur ho tujh ko khizan naashna rahna

jahan-e-rang-o-bu se, pahle qat-e-arzu kar le

isi mein dekh, muzmar hai kamal-e-zindagi tera

jo tujh ko zinat-e-daman koi aina ru kar le