پھولوں کی شہز ادی

کلی سے کہہ رہی تھی ایک دن شبنم گُلستاں میں

رہی مَیں ایک مدّت غنچہ ہائے باغِ رضواں میں

تمھارے گُلستاں کی کیفیت سرشار ہے ایسی

نِگہ فردوس در دامن ہے میری چشمِ حیراں میں

سُنا ہے کوئی شہزادی ہے حاکم اس گُلستاں کی

کہ جس کے نقشِ پا سے پھُول ہوں پیدا بیاباں میں

کبھی ساتھ اپنے اُس کے آستاں تک مجھ کو تُو لے چل

چھُپا کر اپنے دامن میں برنگِ موجِ بُو لے چل

کلی بولی، سریر آرا ہماری ہے وہ شہزادی

درخشاں جس کی ٹھوکر سے ہوں پتھّر بھی نگیں بن کر

مگر فطرت تری اُفتندہ اور بیگم کی شان اونچی

نہیں ممکن کہ تُو پہنچے ہماری ہم‌نشیں بن کر

پہنچ سکتی ہے تُو لیکن ہماری شاہزادی تک

کسی دُکھ درد کے مارے کا اشکِ آتشیں بن کر

نظر اُس کی پیامِ عید ہے اہلِ مُحرّم کو

بنا دیتی ہے گوہر غم زدوں کے اشکِ پیہم کو

kali se kah rahi thi ek din shabnam gulistan mein

rahi main ek muddat ghuncha ha-e-bagh-e-rizwan mein

tumhare gulistan ki kaifiyat sarshar hai aisi

nigah firdaus dar daman hai meri chashm-e-hairan mein

suna hai koi shahzadi hai hakim is gulistan ki

ke jis ke naqsh-e-pa se phul hun paida bayaban mein

kabhi sath apne us ke astan tak mujh ko tu le chal

chhupa kar apne daman mein barang-e-mauj-e-bu le chal

kali boli, sarir ara hamari hai wo shahzadi

darakhshan jis ki thokar se hun patthar bhi nagin ban kar

magar fitrat tiri uftinda aur begam ki shan unchi

nahin mumkin ke tu pahunche hamari hamnashin ban kar

pahunch sakti hai tu lekin hamari shahzadi tak

kisi dukh dard ke mare ka ashk-e-atishin ban kar

nazar us ki payam-e-eid hai ahl-e-mahram ko

bana deti hai gauhar gham zadon ke ashk-e-paiham ko