پھول کا تحفہ عطا ہونے پر

وہ مستِ ناز جو گُلشن میں جا نکلتی ہے

کلی کلی کی زباں سے دُعا نکلتی ہے

“الٰہی! پھُولوں میں وہ انتخاب مجھ کو کرے

کلی سے رشکِ گُلِ آفتاب مجھ کو کرے”

تجھے وہ شاخ سے توڑیں! زہے نصیب ترے

تڑپتے رہ گئے گُلزار میں رقیب ترے

اُٹھا کے صدمۂ فُرقت وصال تک پہنچا

تری حیات کا جوہر کمال تک پہنچا

مرا کنول کہ تصدّق ہیں جس پہ اہلِ نظر

مرے شباب کے گُلشن کو ناز ہے جس پر

کبھی یہ پھُول ہم آغوشِ مدّعا نہ ہوا

کسی کے دامنِ رنگیں سے آشنا نہ ہوا

شگفتہ کر نہ سکے گی کبھی بہار اسے

فسُردہ رکھتا ہے گُلچیں کا انتظار اسے

wo mast-e-naz jo gulshan mein ja nikalti hai

kali kali ki zaban se dua nikalti hai

"ilahi! phulon mein wo intikhab mujh ko kare

kali se rashk-e-gul-e-aftab mujh ko kare"

tujhe wo shakh se toren! zahe nasib tire

tarapte rah gae gulzar mein raqib tire

utha ke sadma-e-furqat wisal tak pahuncha

tiri hayat ka jauhar kamal tak pahuncha

mira kanwal ke tasadduq hain jis pe ahl-e-nazar

mire shabab ke gulshan ko naz hai jis par

kabhi ye phul ham aghosh-e-muddaa na hua

kisi ke daman-e-rangin se ashna na hua

shagufta kar na sakegi kabhi bahar use

fasurda rakhta hai gulchin ka intizar use