پائے غیر اور میرا سر دیکھو

پائے غیر اور میرا سر دیکھو

ٹوٹ جائے نہ سنگ در دیکھو

ایک عالم پڑا ہے چکر میں

گردش چشم فتنہ گر دیکھو

میں نظر بند غیر مد نظر

اپنا دل اور مرا جگر دیکھو

چشم پر نم ہے تن غبار آلود

آن کر سیر بحر و بر دیکھو

فکر افشائے راز کیوں نہ کروں

کیا حیا خیز ہے نظر دیکھو

ہے دگر گوں مریض غم کا حال

ہو سکے تو دوا بھی کر دیکھو

غیر جھلتے ہیں اب انہیں پنکھا

اثر آہ پر شرر دیکھو

کم نمائی و خویشتن بینی

کتنے بے دید ہو ادھر دیکھو

pae ghair aur mera sar dekho

tut jae na sang-e-dar dekho

ek alam para hai chakkar mein

gardish-e-chashm-e-fitna gar dekho

main nazar band-e-ghair mad-e-nazar

apna dil aur mira jigar dekho

chashm pur nam hai tan ghubar alud

an kar sair-e-bahr-o-bar dekho

fikr-e-ifsha-e-raz kyun na karun

kya haya khez hai nazar dekho

hai digar gun mariz-e-gham ka hal

ho sake to dawa bhi kar dekho

ghair jhalte hain ab unhen pankha

asar-e-ah par sharar dekho

kam numai-o-khweshtan bini

kitne be did ho idhar dekho