پریشاں ہوکے میری خاک آخر دل نہ بن جائے

پریشاں ہوکے میری خاک آخر دل نہ بن جائے

جو مشکل اب ہے یا رب پھر وہی مشکل نہ بن جائے

نہ کر دیں مجھ کو مجبورِ نوا فردوس میں حُوریں

مرا سوزِدُروں پھر گرمیِ محفل نہ بن جائے

کبھی چھوڑی ہُوئی منزل بھی یاد آتی ہے راہی کو

کھٹک سی ہے جو سینے میں، غمِ منزل نہ بن جائے

بنایا عشق نے دریائے ناپیدا کراں مجھ کو

یہ میری خود نِگہداری مرا ساحل نہ بن جائے

کہیں اس عالمِ بے رنگ و بُو میں بھی طلب میری

وہی افسانۂ دُنبالۂ محمل نہ بن جائے

عروجِ آدمِ خاکی سے انجم سہمے جاتے ہیں

کہ یہ ٹُوٹا ہوا تارا مہِ کامل نہ بن جائے

pareshan hoke meri khak akhir dil na ban jae

jo mushkil ab hai ya rab phir wahi mushkil na ban jae

na kar den mujh ko majbur-e-nawa firdaus mein huren

mira soziduron phir garmi-e-mahfil na ban jae

kabhi chhori hui manzil bhi yad ati hai rahi ko

khatak si hai jo sine mein, gham-e-manzil na ban jae

banaya ishq ne dariya-e-napaida karan mujh ko

ye meri khud nigahdari mira sahil na ban jae

kahin is alam-e-be rang-o-bu mein bhi talab meri

wahi afsana-e-dumbala-e-mahmil na ban jae

uruj-e-adam-e-khaki se anjum sahme jate hain

ke ye tuta hua tara mah-e-kamil na ban jae