وقت پیری شباب کی باتیں

وقت پیری شباب کی باتیں

ایسی ہیں جیسے خواب کی باتیں

پھر مجھے لے چلا ادھر دیکھو

دل خانہ خراب کی باتیں

واعظا چھوڑ ذکر نعمت خلد

کہہ شراب و کباب کی باتیں

مہ جبیں یاد ہیں کہ بھول گئے

وہ شب ماہتاب کی باتیں

حرف آیا جو آبرو پہ مری

ہیں یہ چشم پرآب کی باتیں

سنتے ہیں اس کو چھیڑ چھیڑ کے ہم

کس مزے سے عتاب کی باتیں

جام مے منہ سے تو لگا اپنے

چھوڑ شرم و حجاب کی باتیں

مجھ کو رسوا کریں گی خوب اے دل

یہ تری اضطراب کی باتیں

جاؤ ہوتا ہے اور بھی خفقاں

سن کے ناصح جناب کی باتیں

قصۂ زلف یار دل کے لیے

ہیں عجب پیچ و تاب کی باتیں

ذکر کیا جوش عشق میں اے ذوقؔ

ہم سے ہوں صبر و تاب کی باتیں

waqt piri shabab ki baten

aisi hain jaise khwab ki baten

phir mujhe le chala idhar dekho

dil khana kharab ki baten

waza chhor zikr nemat khuld

kah sharab-o-kabab ki baten

mah jabin yad hain ke bhul gae

wo shab-e-mahtab ki baten

harf aya jo abru pe miri

hain ye chashm purab ki baten

sunte hain us ko chher chher ke ham

kis maze se itab ki baten

jam-e-mai munh se to laga apne

chhor sharm-o-hijab ki baten

mujh ko ruswa karengi khub ai dil

ye tiri iztirab ki baten

jao hota hai aur bhi khafqan

sun ke naseh janab ki baten

qissa-e-zulf-e-yar-e-dil ke liye

hain ajab pech-o-tab ki baten

zikr kya josh-e-ishq mein ai zauq

ham se hun sabr-o-tab ki baten