وصل کی بنتی ہیں ان باتوں سے تدبیریں کہیں

وصل کی بنتی ہیں ان باتوں سے تدبیریں کہیں

آرزوؤں سے پھرا کرتی ہیں تقدیریں کہیں

بے زبانی ترجمانی شوق بے حد ہو تو ہو

ورنہ پیشِ یار کام آتی ہیں تقریریں کہیں

مِٹ رہی ہیں دل سے یادیں روز گارِ عیش کی

اب نظر کاہے کو آئیں گی یہ تصویریں کہیں

التفات یار تھا اک خوابِ آغازِ وفا

سچ ہوا کرتی ہیں ان خوابوں کی تعبیریں کہیں

تیری بے صبری ہے حسرتؔ خامکاری کی دلیل

گریۂ عشاّق میں ہوتی ہیں تاثیریں کہیں

wasl ki banti hain in baton se tadbiren kahin

arzuon se phira karti hain taqdiren kahin

be zabani tarjumani shauq-e-be had ho to ho

warna pesh-e-yar kam ati hain taqriren kahin

mit rahi hain dil se yaden roz gar-e-aish ki

ab nazar kahe ko aengi ye taswiren kahin

iltifat-e-yar tha ik khwab-e-aghaz-e-wafa

sach hua karti hain in khwabon ki taabiren kahin

teri be sabri hai hasrat khamkari ki dalil

girya-e-ushshaq mein hoti hain tasiren kahin