نکل آیا وہ گھبرا کر دل اس کا اس قدر دھڑکا

نکل آیا وہ گھبرا کر دل اس کا اس قدر دھڑکا

صدا بجلی کی دی نالے نے جب منہ سے مرے کڑکا

ٹھہر کچھ دن میں دست اندازیوں کا وقت آئے گا

نہال نو دمیدہ ہوں بھروسہ کیا مری جڑ کا

ہمیشہ خاک و خوں میں مجھ کو بیتابی بٹھایا کی

بہ شکل مرغ بسمل کون سے پہلو نہیں پھڑکا

خیال عارض روشن میں صبح و شام یکساں ہے

یہاں آٹھوں پہر پیش نظر ہے نور کا تڑکا

یہ سچ ہے وقت پر بے رونقی بھی کام آتی ہے

نہال خشک کو کھٹکا نہیں ہوتا ہے پت جھڑ کا

نہ کیوں پنہاں رکھوں دامن میں اس کو کم نگاہوں سے

سمجھتا ہوں میں اپنا اشک گلگوں لعل گودڑ کا

گزرتا ہے سلامت واقف انجام مطلب سے

نہیں رستہ کھٹکتا آنکھ میں دہقاں کی بیہڑ کا

لیے ہیں گل کے بوسے آج کس چوری سے بلبل نے

پڑا سویا کیا گلچیں کوئی پتا نہیں کھڑکا

چھپایا پردۂ فانوس بن کر جسم عریاں نے

درون استخواں سے جس گھڑی شعلہ کوئی بھڑکا

بجز ایما کلام عشق مطلب سے معرا ہے

کسی پر راز کھل سکتا نہیں مجذوب کی بڑ کا

فصاحت کے خلاف آئے نظر سب قافیے ہم کو

نسیمؔ ایسی زمیں پر کیجیے اطلاق بیہڑ کا

nikal aya wo ghabra kar dil us ka is qadar dharka

sada bijli ki di nale ne jab munh se mire karka

thahar kuchh din mein dast andaziyon ka waqt aega

nihal-e-nau damida hun bharosa kya miri jur ka

hamesha khak-o-khun mein mujh ko betabi bithaya ki

ba shakl-e-murgh-e-bismil kaun se pahlu nahin pharka

khayal-e-ariz-e-raushan mein subh-o-sham yaksan hai

yahan athon pahar pesh-e-nazar hai nur ka tarka

ye sach hai waqt par be raunaqi bhi kam ati hai

nihal-e-khushk ko khatka nahin hota hai pat jhar ka

na kyun pinhan rakhun daman mein us ko kam nigahon se

samajhta hun main apna ashk-e-gulgun laal godar ka

guzarta hai salamat waqif-e-anjam matlab se

nahin rasta khatakta ankh mein dehqan ki behar ka

liye hain gul ke bose aj kis chori se bulbul ne

para soya kiya gulchin koi patta nahin kharka

chhupaya parda-e-fanus ban kar jism uryan ne

darun-e-ustukhwan se jis ghari shola koi bharka

bajuz ima kalam-e-ishq matlab se muarra hai

kisi par raz khul sakta nahin majzub ki bar ka

fasahat ke khilaf ae nazar sab qafiye ham ko

nasim aisi zamin par kijiye itlaq behar ka