نکالی جائے کس ترکیب سے تقریر کی صورت

نکالی جائے کس ترکیب سے تقریر کی صورت

وہ آئینہ کی صورت اور میں تصویر کی صورت

گرفتار محبت کر لیا باتوں ہی باتوں میں

تسلسل سے نمایاں ہو گئی زنجیر کی صورت

زیادہ آئینہ سے ہے منور مصحف عارض

اور اس پر خال مشکیں آیۂ تطہیر کی صورت

ترے تیور بدلتے ہی زمانہ ہو گیا دشمن

ہلال عید بھی ظاہر ہوا شمشیر کی صورت

ستم ہو جائے گا گر بال بھی بیکا ہوا اس کا

نکل کر آہ سینہ سے گئی ہے تیر کی صورت

کبھی میٹھی نگاہیں ہیں کبھی تیور بدلتے ہیں

نہ مرتا ہوں نہ جیتا ہوں یہ ہے تعزیر کی صورت

مزہ کیا اس بت بے پیر سے دل کے لگانے کا

جو خلوت میں ہو بت محفل میں ہو تصویر کی صورت

خفا ہوتے ہی کچھ کا کچھ بھوؤں کا ہو گیا نقشہ

کبھی خنجر کی صورت اور کبھی شمشیر کی صورت

جسے مل جائے خاک پاک دشت کربلا پرویںؔ

پلٹ کر بھی نہ دیکھے وہ کبھی اکسیر کی صورت

nikali jae kis tarkib se taqrir ki surat

wo aina ki surat aur main taswir ki surat

giraftar-e-mohabbat kar liya baton hi baton mein

tasalsul se numayan ho gai zanjir ki surat

ziyada aina se hai munawwar mushaf-e-ariz

aur us par khal mushkin aya-e-tathir ki surat

tire tewar badalte hi zamana ho gaya dushman

hilal-e-eid bhi zahir hua shamshir ki surat

sitam ho jaega gar bal bhi bika hua us ka

nikal kar ah sina se gai hai tir ki surat

kabhi mithi nigahen hain kabhi tewar badalte hain

na marta hun na jita hun ye hai taazir ki surat

maza kya us but-e-be pir se dil ke lagane ka

jo khalwat mein ho but mahfil mein ho taswir ki surat

khafa hote hi kuchh ka kuchh bhuon ka ho gaya naqsha

kabhi khanjar ki surat aur kabhi shamshir ki surat

jise mil jae khak-e-pak dasht-e-karbala parwin

palat kar bhi na dekhe wo kabhi iksir ki surat