ننھا غاصب

مرے گھر کی دیوی کے بالائے سینہ

کھلا ہے محبت کا تازہ کنول

درخشندہ جیسے سر شام زہرہ

افق پر سمندر کے آئے نکل

وہ ہاتھوں پہ اپنے کھلاتی ہے اس کو

وہ پیروں پہ اپنے جھلاتی ہے اس کو

وہ رکھتی ہے آنکھوں میں پتلی بنا کے

وہ سوتے میں روتا جو اٹھ بیٹھتا ہے

تو بوسوں سے موتی سے آنسو وہ پونچھے

وہ سو جان سے ہر ادا پر فدا ہے

وہ ہے لال دونوں جہاں جس پہ صدقے

یہ ننھی سی جاں اور غاصب کے دعوے

مرا تخت زریں ہے تیرے حوالے

ترے دست و بازو فرشتوں کے دستے

تو ہے وہ زبردست جیتے پہ جیتے

mire ghar ki dewi ke bala-e-sina

khula hai mohabbat ka taza kanwal

darakhshinda jaise sar-e-sham-e-zohra

ufuq par samundar ke ae nikal

wo hathon pe apne khilati hai us ko

wo pairon pe apne jhallati hai us ko

wo rakhti hai ankhon mein putli bana ke

wo sote mein rota jo uth baithta hai

tu boson se moti se ansu wo ponchhe

wo sau jan se har ada par fida hai

wo hai lal donon jahan jis pe sadqe

ye nanhi si jan aur ghasib ke daawe

mira takht-e-zarrin hai tere hawale

tire dast-o-bazu farishton ke diste

tu hai wo zabardast jite pe jite