نقش دل ہے ستم جدائی کا

نقش دل ہے ستم جدائی کا

شوق پھر کس کو آشنائی کا

چکھتے ہیں اب مزا جدائی کا

یہ نتیجہ ہے آشنائی کا

ان کے دل کی کدورت اور بڑھی

ذکر کیجیے اگر صفائی کا

دیکھ تو سنگ آستاں پہ ترے

ہے نشاں کس کی جبہہ سائی کا

تیرے در کا گدا جو ہے اے دوست

عیش کرتا ہے بادشائی کا

دختر رز نے کر دیا باطل

مجھ کو دعویٰ تھا پارسائی کا

کرتے ہیں اہل آسماں چرچا

میرے نالوں کی نارسائی کا

کاٹ ڈالو اگر زباں پہ مرے

حرف آیا ہو آشنائی کا

کر کے صدقے نہ چھوڑ دیں نساخؔ

دل کو دھڑکا ہے کیوں رہائی کا

naqsh-e-dil hai sitam judai ka

shauq phir kis ko ashnai ka

chakhte hain ab maza judai ka

ye natija hai ashnai ka

un ke dil ki kudurat aur barhi

zikr kijiye agar safai ka

dekh to sang-e-astan pe tire

hai nishan kis ki jabha sai ka

tere dar ka gada jo hai ai dost

aish karta hai badshai ka

dukhtar-e-raz ne kar diya batil

mujh ko daawa tha parsai ka

karte hain ahl-e-asman charcha

mere nalon ki narasai ka

kat dalo agar zaban pe mire

harf aya ho ashnai ka

kar ke sadqe na chhor den nassakh

dil ko dharka hai kyun rihai ka