نفَس نہ انجمنِ آرزو سے باہر کھینچ

نفَس نہ انجمنِ آرزو سے باہر کھینچ

اگر شراب نہیں انتظارِ ساغر کھینچ

“کمالِ گرمیِ سعیِ تلاشِ دید” نہ پوچھ

بہ رنگِ خار مرے آئینہ سے جوہر کھینچ

تجھے بہانۂ راحت ہے انتظار اے دل!

کیا ہے کس نے اشارہ کہ نازِ بستر کھینچ

تری طرف ہے بہ حسرت نظارۂ نرگس

بہ کوریِ دل و چشمِ رقیب ساغر کھینچ

بہ نیم غمزہ ادا کر حقِ ودیعتِ ناز

نیامِ پردۂ زخمِ جگر سے خنجر کھینچ

مرے قدح میں ہے صہبائے آتشِ پنہاں

بروئے سُفرہ کبابِ دلِ سمندر کھینچ

نہ کہہ کہ طاقتِ رسوائیِ وصال نہیں

اگر یہی عَرَقِ فتنہ ہے، مکرّر کھینچ

جنونِ آئینہ مشتاقِ یک تماشا ہے

ہمارے صفحے پہ بالِ پری سے مسطر کھینچ

خمارِ مِنّتِ ساقی اگر یہی ہے اسدؔ

دل گداختہ کے مے کدے میں ساغر کھینچ

nafas na anjuman-e-arzu se bahar khinch

agar sharab nahin intizar-e-saghar khinch

"kamal-e-garmi-e-sai-e-talash-e-did" na puchh

ba rang-e-khar mire aina se jauhar khinch

tujhe bahana-e-rahat hai intizar ai dil!

kya hai kis ne ishara ke naz-e-bistar khinch

tiri taraf hai ba hasrat nazara-e-nargis

ba kori-e-dil-o-chashm-e-raqib saghar khinch

ba nim ghamza ada kar haq-e-wadiat-e-naz

niyam-e-parda-e-zakhm-e-jigar se khanjar khinch

mire qadah mein hai sahba-e-atish-e-pinhan

baru-e-sufra kabab-e-dil-e-samundar khinch

na kah ke taqat-e-ruswai-e-wisal nahin

agar yahi araq-e-fitna hai, mukarrar khinch

junun-e-aina mushtaq-e-yak tamasha hai

hamare safhe pe bal-e-pari se mistar khinch

khumar-e-minnat-e-saqi agar yahi hai asad

dil-e-gudakhta ke mai kade mein saghar khinch