نوائے غم

زندگانی ہے مری مثلِ ربابِ خاموش

جس کی ہر رنگ کے نغموں سے ہے لبریز آغوش

بربطِ کون و مکاں جس کی خموشی پہ نثار

جس کے ہر تار میں ہیں سینکڑوں نغموں کے مزار

محشرستانِ نوا کا ہے امیں جس کا سکُوت

اور منّت کشِ ہنگامہ نہیں جس کا سکُوت

آہ! اُمیّد محبت کی بر آئی نہ کبھی

چوٹ مضراب کی اس ساز نے کھائی نہ کبھی

مگر آتی ہے نسیمِ چمنِ طُور کبھی

سمتِ گردُوں سے ہوائے نفَسِ حُور کبھی

چھیڑ آہستہ سے دیتی ہے مرا تارِ حیات

جس سے ہوتی ہے رِہا رُوحِ گرفتارِ حیات

نغمۂ یاس کی دھیمی سی صدا اُٹھتی ہے

اشک کے قافلے کو بانگِ درا اُٹھتی ہے

جس طرح رفعتِ شبنم ہے مذاقِ رم سے

میری فطرت کی بلندی ہے نوائے غم سے

zindagani hai miri misl-e-rabab-e-khamosh

jis ki har rang ke naghmon se hai labrez aghosh

barbat-e-kaun-o-makan jis ki khamoshi pe nisar

jis ke har tar mein hain sainkron naghmon ke mazar

mahsharsitan-e-nawa ka hai amin jis ka sukut

aur minnat kash-e-hangama nahin jis ka sukut

ah! umyyd-e-mohabbat ki bar ai na kabhi

chot mizrab ki is saz ne khai na kabhi

magar ati hai nasim-e-chaman-e-tur kabhi

samt-e-gardun se hawa-e-nafas-e-hur kabhi

chher ahista se deti hai mira tar-e-hayat

jis se hoti hai riha ruh-e-giraftar-e-hayat

naghma-e-yas ki dhimi si sada uthti hai

ashk ke qafile ko bang-e-dara uthti hai

jis tarah rifat-e-shabnam hai mazaq-e-ram se

meri fitrat ki bulandi hai nawa-e-gham se