نذر وطن

نذر وطن پھر اے دل دیوانہ چاہئے

پھر ہر قدم پہ سجدۂ شکرانہ چاہئے

پھر سر زمیں وطن کی ہے نظروں کے سامنے

پھر لب پہ ایک نعرۂ مستانہ چاہئے

بچپن کی یاد لیتی ہے پھر دل میں چٹکیاں

پھر بے خودی بہ حجت طفلانہ چاہئے

برسوں کے بعد آئے ہیں باغ وطن میں ہم

پھر ہر کلی کو سجدۂ مستانہ چاہئے

کہسار سبز پوش نظر آئے دور سے

پھر لب پہ چار بیت کا افسانہ چاہئے

جس کوچے میں ہوئیں کبھی رسوائیاں نصیب

اس کا طواف با دل دیوانہ چاہئے

بخشا تھا جس نے پہلے پہل دل کو درد عشق

پھر اس کے در پہ سجدۂ شکرانہ چاہئے

پھر دل کو ہو یقیں نہ کسی کے وصال کا

پھر واقعہ بہ صورت افسانہ چاہئے

پھر شوق سے ملیں گے کسی گلعذار سے

پھر لب پہ شور بلبل مستانہ چاہئے

جھولا جھلائیں‌ گے کسی مست شباب کو

رقصاں فضا میں پھر مئے‌ و مے خانہ چاہئے

پائے طلب کو وادئ پرویں ہے نیم گام

پھر آرزو کو منزل جانانہ چاہئے

پھر خرمن سکوں کو ہیں درکار بجلیاں

پھر بے حجاب جلوۂ جانانہ چاہئے

پھر ذوق مے کشی کو ہے معراج کی طلب

کوثر کا بادہ چاند کا پیمانہ چاہئے

پھر شوق بن کے دل میں دھڑکتی ہے زندگی

پھر جنبش تبسم جانانہ چاہئے

پھر سینۂ امید میں رقصاں ہے برق طور

پھر پرسش مذاق کلیمانہ چاہئے

بالائے کوہ سایۂ ابر بہار میں

پروین و ماہتاب کا کاشانہ چاہئے

پھر اس حریم نور کے آغوش ناز میں

اک گل کدہ برنگ پری خانہ چاہئے

پھر ابر و باغ و نکہت و گل کے ہجوم میں

شمع و سرو و بادہ و پیمانہ چاہئے

پھر اس کی چشم مست پہ گیسو ہوں پر فشاں

پھر ابر شام گوں سر مے خانہ چاہئے

پھر چاندنی میں دامن دریا یہ اے ندیم

رقص شراب و گردش پیمانہ چاہئے

جوش‌ طرب نے حشر سا دل میں کیا بپا

پھر بے خودی کو گریۂ مستانہ چاہئے

اخترؔ وطن میں آ کے کھلا ہے یہ حسن راز

اس مختصر سی عمر میں کیا کیا نہ چاہئے

nazr-e-watan phir ai dil-e-diwana chahiye

phir har qadam pe sajda-e-shukrana chahiye

phir sar zamin watan ki hai nazron ke samne

phir lab pe ek naara-e-mastana chahiye

bachpan ki yad leti hai phir dil mein chutkiyan

phir be khudi ba hujjat-e-tiflana chahiye

barson ke baad ae hain bagh-e-watan mein ham

phir har kali ko sajda-e-mastana chahiye

kohsar sabz posh-e-nazar ae dur se

phir lab pe char bit ka afsana chahiye

jis kuche mein huin kabhi ruswaiyan nasib

us ka tawaf ba dil-e-diwana chahiye

bakhsha tha jis ne pahle pahal dil ko dard-e-ishq

phir us ke dar pe sajda-e-shukrana chahiye

phir dil ko ho yaqin na kisi ke wisal ka

phir waqia ba surat-e-afsana chahiye

phir shauq se milenge kisi gulizar se

phir lab pe shor-e-bulbul-e-mastana chahiye

jhula jhallaenge kisi mast-e-shabab ko

raqsan faza mein phir mai-o-mai khana chahiye

pae talab ko wadi-e-parwin hai nim gam

phir arzu ko manzil-e-janana chahiye

phir khirman-e-sukun ko hain darkar bijliyan

phir be hijab jalwa-e-janana chahiye

phir zauq-e-mai kashi ko hai meraj ki talab

kausar ka bada chand ka paimana chahiye

phir shauq ban ke dil mein dharakti hai zindagi

phir jumbish-e-tabassum janana chahiye

phir sina-e-umid mein raqsan hai barq-e-tur

phir pursish-e-mazaq-e-kalimana chahiye

bala-e-koh-e-saya-e-abr-e-bahar mein

parwin-o-mahtab ka kashana chahiye

phir is harim-e-nur ke aghosh-e-naz mein

ik gul kada barang-e-pari khana chahiye

phir abr-o-bagh-o-nikhat-o-gul ke hujum mein

shama-o-sarw-o-bada-o-paimana chahiye

phir us ki chashm-e-mast pe gesu hun par fishan

phir abr-e-sham gun sar-e-mai khana chahiye

phir chandni mein daman-e-dariya ye ai nadim

raqs-e-sharab-o-gardish-e-paimana chahiye

josh-e-tarab ne hashr sa dil mein kiya bapa

phir be khudi ko girya-e-mastana chahiye

akhtar watan mein a ke khula hai ye husn-e-raz

is mukhtasar si umr mein kya kya na chahiye