نغمۂ دل سوز

ہے مزاج اس وقت کچھ بگڑا ہوا صیاد کا

اے اسیران قفس موقع نہیں فریاد کا

کتنا درد آمیز تھا نغمہ دل ناشاد کا

تیر ترکش میں تڑپ اٹھا ستم ایجاد کا

داستان‌ عالم فرقت کسی سے کیا کہیں

ہو گیا برباد ہر ذرہ دل ناشاد کا

آپ کو ملنا نہیں منظور لو مرتا ہوں میں

منتظر بیٹھا ہوا تھا آپ کے ارشاد کا

اے دل ناشاد مجھ کو تیری وحشت دیکھ کر

یاد آ جاتا ہے قصہ قیس اور فرہاد کا

آئے وہ بہر عیادت ڈال کر رخ پر نقاب

رہ گیا ارمان دل میں عاشق ناشاد کا

آپ فرماتے ہیں تو نے رات کو نالے کئے

بندہ پرور اوجؔ تو عادی نہیں فریاد کا

hai mizaj is waqt kuchh bigra hua sayyad ka

ai asiran-e-qafas mauqaa nahin fariyad ka

kitna dard amez tha naghma dil-e-nashad ka

tir tarkash mein tarap utha sitam ijad ka

dastan-e-alam-e-furqat kisi se kya kahen

ho gaya barbad har zarra dil-e-nashad ka

ap ko milna nahin manzur lo marta hun main

muntazir baitha hua tha ap ke irshad ka

ai dil-e-nashad mujh ko teri wahshat dekh kar

yad a jata hai qissa qais aur farhad ka

ae wo bahr-e-ayadat dal kar rukh par naqab

rah gaya arman-e-dil mein ashiq-e-nashad ka

ap farmate hain tu ne rat ko nale kiye

banda parwar auj to adi nahin fariyad ka