نظر آتی ہے دور کی صورت

نظر آتی ہے دور کی صورت

آنکھ میں ہے حضور کی صورت

ایک یہ بھی ہے نور کی صورت

دیکھ لی شمع طور کی صورت

کیوں نہ ہو جان کا عذاب یہ جسم

تنگ زنداں قبور کی صورت

سر تربت کوئی ہے فتنۂ حشر

ہوئی پیدا فتور کی صورت

خانقہ میں پری تھی شیشے کی

بن کے آئی جو حور کی صورت

آ گیا کیا سوئے قفس صیاد

ہو گئی کیا طیور کی صورت

پھرتی ہے آنکھ میں بہ صد حسرت

اب دل ناصبور کی صورت

ایک ہے ایک کبریائی میں

اف وہ اس کے غرور کی صورت

حشر زا اف وہ صور کی آواز

وہ سرافیل و صور کی صورت

باڑھ تلوار کی صراط کا پل

اور مشکل عبور کی صورت

شعلہ زار ایک لالہ زار ہے ایک

سامنے نار و نور کی صورت

مضطرب اپنے حال پر ہر ایک

ہائے ہر ناصبور کی صورت

فرد عصیاں نوشتۂ تقدیر

ہائے ہر بے قصور کی صورت

آس اس کے کرم کی قہر کا ڈر

جو ہو رب غفور کی صورت

اے میں قربان شان رحمت کے

نظر آئی حضور کی صورت

کس کو پروائے کوثر و تسنیم

ہوئی پیدا سرور کی صورت

صدقے کیا جلد حشر میں بدلی

مجھ سراپا قصور کی صورت

ہو مبارک سیاہ کار ریاضؔ

نور کی شکل نور کی صورت

nazar ati hai dur ki surat

ankh mein hai huzur ki surat

ek ye bhi hai nur ki surat

dekh li sham-e-tur ki surat

kyun na ho jan ka azab ye jism

tang zindan qubur ki surat

sar-e-turbat koi hai fitna-e-hashr

hui paida futur ki surat

khanqa mein pari thi shishe ki

ban ke ai jo hur ki surat

a gaya kya su-e-qafas sayyad

ho gai kya tuyur ki surat

phirti hai ankh mein ba sad hasrat

ab dil-e-nasabur ki surat

ek hai ek kibriyai mein

uf wo us ke ghurur ki surat

hashr za uf wo sur ki awaz

wo sarafil-o-sur ki surat

barh talwar ki sirat ka pal

aur mushkil ubur ki surat

shola zar ek lala zar hai ek

samne nar-o-nur ki surat

muztarib apne hal par har ek

hae har nasabur ki surat

fard isyan nawashta-e-taqdir

hae har be qusur ki surat

as us ke karam ki qahr ka dar

jo ho rab-e-ghafur ki surat

ai main qurban shan rahmat ke

nazar ai huzur ki surat

kis ko parwae kausar-o-tasnim

hui paida surur ki surat

sadqe kya jald hashr mein badli

mujh sarapa qusur ki surat

ho mubarak siyah kar riyaz

nur ki shakl nur ki surat