Arooz is now on the App Store, for iPhone and iPad. Download →

All poetry

نصرت الملک بہادر مجھے بتلا کہ مجھے

Mirza Ghalib (1797–1869)

نصرت الملک بہادر مجھے بتلا کہ مجھے

تجھ سے جو اتنی ارادت ہے تو کس بات سے ہے

گرچہ تو وہ ہے کہ ہنگامہ اگر گرم کرے

رونق بزم مہ مہر تری ذات سے ہے

اور میں وہ ہوں کہ گر جی میں کبھی غور کروں

غیر کیا خود مجھے نفرت مری اوقات سے ہے

خستگی کا ہو بھلا جس کے سبب سے سر دست

نسبت اک گونہ مرے دل کو ترے ہات سے ہے

ہاتھ میں تیرے رہے تو سن دولت کی عناں

یہ دعا شام و سحر قاضی حاجات سے ہے

تو سکندر ہے مرا فخر ہے ملنا تیرا

گو شرف خضر کی بھی مجھ کو ملاقات سے ہے

اس پہ گزرے نہ گماں ریوو ریا کا زنہار

غالبؔ خاک نشیں اہل خرابات سے ہے