مہرباں پاتے نہیں تیرے تئیں یک آن ہم

مہرباں پاتے نہیں تیرے تئیں یک آن ہم

پھر بھلا دل کے نکالیں کس طرح ارمان ہم

ہر قدم پر جس کے اعجاز مسیحائی فدا

اس ادا اس ناز اس رفتار کے قربان ہم

عمر بھر ساقی نہ چھوڑی مے کدہ کی بندگی

ایک ہی پیمانے پر کرتے ہیں یہ پیمان ہم

کوئی تو دعوت بتا دو اس طرح کی شیخ جی

ایک شب تو اپنے گھر اس کو رکھیں مہمان ہم

ہاں مگر صلوات پڑھنا دیکھ تجھ کو دم بدم

اور کیا رکھتے ہیں تیری شان کے شایان ہم

جی میں ہم برپا کریں زنجیر کا غل اے جنوں

وادی مجنوں کو دیکھیں کس طرح سنسان ہم

رات دن صحبت ہے جن کو بے تکلف آپ سے

پوچھنا کیا وہ تو بہتر ہیں بھلا اے جان ہم

تو نے دزدیدہ نگاہیں جب لڑائیں غیر سے

ہو گئے ناچار پیارے جان کر انجان ہم

ہم نشیں سرکار کے ہی جا بجا غماز ہیں

کیجئے تحقیق اسے کرتے نہیں بہتان ہم

سیر کو آتا ہے وہ ایمانؔ جا کر باغ میں

کھول دیویں چار دن آگے ہی گل کے کان ہم

mehrban pate nahin tere tain yak an ham

phir bhala dil ke nikalen kis tarah arman ham

har qadam par jis ke ejaz-e-masihai fida

is ada is naz is raftar ke qurban ham

umr bhar saqi na chhori mai kada ki bandagi

ek hi paimane par karte hain ye paiman ham

koi to daawat bata do is tarah ki shaikh ji

ek shab to apne ghar us ko rakhen mehman ham

han magar salwat parhna dekh tujh ko dam badam

aur kiya rakhte hain teri shan ke shayan ham

ji mein ham barpa karen zanjir ka ghul ai junun

wadi-e-majnun ko dekhen kis tarah sunsan ham

rat din sohbat hai jin ko be takalluf ap se

puchhna kya wo to behtar hain bhala ai jan ham

tu ne duzdida nigahen jab laraen ghair se

ho gae nachar pyare jan kar anjan ham

ham nashin sarkar ke hi ja baja ghammaz hain

kijiye tahqiq use karte nahin bohtan ham

sair ko ata hai wo iman ja kar bagh mein

khol dewen char din age hi gul ke kan ham