مہربانی ہے عیادت کو جو آتے ہیں مگر

مہربانی ہے عیادت کو جو آتے ہیں مگر

کس طرح ان سے ہمارا حال دیکھا جائے گا

دفتر دنیا الٹ جائے گا باطل یک قلم

ذرہ ذرہ سب کا اصلی حال دیکھا جائے گا

آفیشل اعمال نامہ کی نہ ہوگی کچھ سند

حشر میں تو نامۂ اعمال دیکھا جائے گا

بچ رہے طاعون سے تو اہل غفلت بول اٹھے

اب تو مہلت ہے پھر اگلے سال دیکھا جائے گا

تہ کرو صاحب نسب نامی وہ وقت آیا ہے اب

بے اثر ہوگی شرافت مال دیکھا جائے گا

رکھ قدم ثابت نہ چھوڑ اکبرؔ صراط مستقیم

خیر چل جانے دے ان کی چال دیکھا جائے گا

mehrbani hai ayadat ko jo ate hain magar

kis tarah un se hamara hal dekha jaega

daftar-e-duniya ulat jaega batil yak qalam

zarra zarra sab ka asli hal dekha jaega

afishal aamal nama ki na hogi kuchh sanad

hashr mein to nama-e-aamal dekha jaega

bach rahe taun se to ahl-e-ghaflat bol uthe

ab to mohlat hai phir agle sal dekha jaega

tah karo sahab nasab nami wo waqt aya hai ab

be asar hogi sharafat mal dekha jaega

rakh qadam sabit na chhor akbar sirat-e-mustaqim

khair chal jane de un ki chal dekha jaega