مقرر کچھ نہ کچھ اس میں رقیبوں کی بھی سازش ہے

مقرر کچھ نہ کچھ اس میں رقیبوں کی بھی سازش ہے

وہ بے پروا الٰہی مجھ پہ کیوں گرم نوازش ہے

پے مشق تغافل آپ نے مخصوص ٹھہرایا

ہمیں یہ بات بھی منجملۂ اسباب نازش ہے

مٹا دے خود ہمیں گر شکوۂ غم مٹ نہیں سکتا

جفائے یار سے یہ آخری اپنی گزارش ہے

کہاں ممکن کسی کو باریابی ان کی محفل میں

نہ اطمینان کوشش ہے نہ امید سفارش ہے

نہاں ہے دل پذیری جس کے ہر ہر لفظ شیریں میں

یہ کس جان وفا کے ہاتھ کی رنگیں نگارش ہے

کیا تھا ایک دن دل نے جو دعوئے شکیبائی

سو اب تک ان کے ناز دلبری کو ہم سے کاوش ہے

ہجوم یاس نے بیدل کیا ایسا کہ حسرتؔ کو

ترے آنے کی اب امید باقی ہے نہ خواہش ہے

muqarrar kuchh na kuchh is mein raqibon ki bhi sazish hai

wo be parwa ilahi mujh pe kyun garm-e-nawazish hai

pe mashq-e-taghaful ap ne makhsus thahraya

hamen ye bat bhi minjumla-e-asbab-e-nazish hai

mita de khud hamen gar shikwa-e-gham mit nahin sakta

jafa-e-yar se ye akhiri apni guzarish hai

kahan mumkin kisi ko baryabi un ki mahfil mein

na itminan-e-koshish hai na ummid-e-sifarish hai

nihan hai dil piziri jis ke har har lafz-e-shirin mein

ye kis jan-e-wafa ke hath ki rangin nigarish hai

kya tha ek din dil ne jo doe shakebai

so ab tak un ke naz-e-dilbari ko ham se kawish hai

hujum-e-yas ne bedil kiya aisa ke hasrat ko

tire ane ki ab ummid baqi hai na khwahish hai