مل خون جگر میرا ہاتھوں سے حنا سمجھے

مل خون جگر میرا ہاتھوں سے حنا سمجھے

میں اور تو کیا کوسوں پر تم سے خدا سمجھے

سمجھانے کی جو باتیں کیں میں نے دلا تجھ سے

اے عقل کی دشمن سو تیری تو بلا سمجھے

دل میں مرے چٹکی لی ایسی ہے کہ درد اٹھا

معقول چے خوش اے واہ آپ اس کو ادا سمجھے

اے بو لہب نخوت سیدھے ہیں اگر سچ مچ

تو آج سے صاحب کو ہم اپنا چچا سمجھے

صاحب نے نہ کی یاری وحشت سے پری سے تو

اے شیخ جنوں تم کو ہم خواجہ سرا سمجھے

ہنگامۂ محشر بھی گر سامنے آیا تو

اس کو بھی تماشائی ایک سانگ نیا سمجھے

وہ دشت محبت میں رکھے قدم اے انشاؔ

سر اپنے کو آگے ہی جو تن سے جدا سمجھے

mil khun-e-jigar mera hathon se hina samjhe

main aur to kiya koson par tum se khuda samjhe

samjhane ki jo baten kin main ne dila tujh se

ai aql ki dushman so teri to bala samjhe

dil mein mire chutki li aisi hai ke dard utha

maaqul che khush ai wah ap us ko ada samjhe

ai bu lahab nakhwat sidhe hain agar sach much

to aj se sahab ko ham apna chacha samjhe

sahab ne na ki yari wahshat se pari se to

ai shaikh junun tum ko ham khwaja sara samjhe

hangama-e-mahshar bhi gar samne aya to

us ko bhi tamashai ek sang naya samjhe

wo dasht-e-mohabbat mein rakhe qadam ai insha

sar apne ko age hi jo tan se juda samjhe