مقدور نہیں اس کی تجلی کے بیاں کا

مقدور نہیں اس کی تجلی کے بیاں کا

جوں شمع سراپا ہو اگر صرف زباں کا

پردے کو تعین کے در دل سے اٹھا دے

کھلتا ہے ابھی پل میں طلسمات جہاں کا

ٹک دیکھ صنم خانۂ عشق آن کے اے شیخ

جوں شمع حرم رنگ جھلکتا ہے بتاں کا

اس گلشن ہستی میں عجب دید ہے لیکن

جب چشم کھلی گل کی تو موسم ہے خزاں کا

دکھلائیے لے جا کے تجھے مصر کا بازار

لیکن نہیں خواہاں کوئی واں جنس گراں کا

ہستی سے عدم تک نفس چند کی ہے راہ

دنیا سے گزرنا سفر ایسا ہے کہاں کا

سوداؔ جو کبھو گوش سے ہمت کے سنے تو

مضمون یہی ہے جرس دل کی فغاں کا

maqdur nahin us ki tajalli ke bayan ka

jun shama sarapa ho agar sirf zaban ka

parde ko taayyun ke dar-e-dil se utha de

khulta hai abhi pal mein tilismat jahan ka

tuk dekh sanam khana-e-ishq an ke ai shaikh

jun sham-e-haram rang jhalakta hai butan ka

is gulshan-e-hasti mein ajab did hai lekin

jab chashm khuli gul ki to mausam hai khizan ka

dikhlaiye le ja ke tujhe misr ka bazar

lekin nahin khwahan koi wan jins-e-giran ka

hasti se adam tak nafas-e-chand ki hai rah

duniya se guzarna safar aisa hai kahan ka

sauda jo kabhu gosh se himmat ke sune to

mazmun yahi hai jaras-e-dil ki fughan ka