مل مجھ سے اے پری تجھے قرآن کی قسم

مل مجھ سے اے پری تجھے قرآن کی قسم

دیتا ہوں تجھ کو تخت سلیمان کی قسم

کر و بیوں کی تجھ کو قسم اور عرش کی

جبریل کی قسم تجھے رضوان کی قسم

طوبیٰ کی سلسبیل کی کوثر کے جام کی

حور و قصور و جنت و غلمان کی قسم

روح القدس کی تجھ کو قسم اور مسیح کی

مریم کے تجھ کو عفت دامان کی قسم

توریت کی قسم قسم انجیل کی تجھے

تجھ کو قسم زبور کی فرقان کی قسم

تجھ کو محمد عربی کی قسم ہے اور

مولا علی کی شاہ خراسان کی قسم

ملت میں جس کی تو ہوئی اس کی قسم تجھے

اور اپنے دین مذہب و ایمان کی قسم

داماں کو میری ہاتھ سے اس رات مت جھٹک

تجھ کو سحر کے چاک گریبان کی قسم

مدت سے تیری چاہ ذقن میں غریق ہوں

باللہ مجھ کو یوسف کنعان کی قسم

قیدی ہوں میں ترا بخدا وندی‌ٔ خدا

اور اس عزیز مصر کے زندان کی قسم

موسیٰ کی ہے قسم تجھے اور کوہ طور کی

نور و فروغ جلوۂ لمعان کی قسم

نرگس کی آنکھ کی قسم اور گل کے کان کی

تجھ کو سر عزیز گلستاں کی قسم

تجھ کو قسم ہے غنچۂ زنبق کے ناک کی

اور شور‌ عندلیب غزلخوان کی قسم

سونے کی گائے کی قسم اور رود نیل کی

لیلیٰ کی ہے تجھے صف مژگان کی قسم

ایسی بڑی قسم بھی نہ مانے تو ہے تجھے

تجھ کو اسی کے شوکت‌ ذیشان کی قسم

دیو‌ سفید کی قسم اور کوہ قاف کی

باغ ارم کی اور پرستان کی قسم

لونا چماری کی قسم اور کلو عبیر کی

کالی بلا کی غول بیابان کی قسم

قسمیں تو ساری ہو چکیں باقی رہی ہے اب

پیپل تلے کے بھتنے کی شیطان کی قسم

ہاں پھر تو کہیو ہائے وہ کس طرح ہوئے غضب

انشاؔ نہ چھیڑ مجھ کو مری جان کی قسم

mil mujh se ai pari tujhe quran ki qasam

deta hun tujh ko takht-e-sulaiman ki qasam

kar-o-biyon ki tujh ko qasam aur arsh ki

jibril ki qasam tujhe rizwan ki qasam

tuba ki salsabil ki kausar ke jam ki

hur-o-qusur-o-jannat-o-ghilman ki qasam

ruh alqudus ki tujh ko qasam aur masih ki

maryam ke tujh ko iffat-e-daman ki qasam

taurait ki qasam qasam injil ki tujhe

tujh ko qasam zabur ki furqan ki qasam

tujh ko mohammad-e-arabi ki qasam hai aur

maula ali ki shah khurasan ki qasam

millat mein jis ki to hui us ki qasam tujhe

aur apne din-e-mazhab-o-iman ki qasam

daman ko meri hath se is rat mat jhatak

tujh ko sahar ke chak gareban ki qasam

muddat se teri chah-e-zaqan mein ghariq hun

balla mujh ko yusuf-e-kanan ki qasam

qaidi hun main tira bakhuda wandi-e-khuda

aur is aziz-e-misr ke zindan ki qasam

musa ki hai qasam tujhe aur koh-e-tur ki

nur-o-farogh-e-jalwa-e-laman ki qasam

nargis ki ankh ki qasam aur gul ke kan ki

tujh ko sar aziz gulistan ki qasam

tujh ko qasam hai ghuncha-e-zambaq ke nak ki

aur shor-e-andalib ghazalkhwan ki qasam

sone ki gae ki qasam aur rod-e-nil ki

laila ki hai tujhe saf-e-mizhgan ki qasam

aisi bari qasam bhi na mane to hai tujhe

tujh ko usi ke shaukat-e-zishan ki qasam

dew-e-safed ki qasam aur koh-e-qaf ki

bagh-e-iram ki aur paristan ki qasam

lona chamari ki qasam aur kalo abir ki

kali bala ki ghaul bayaban ki qasam

qasmen to sari ho chuken baqi rahi hai ab

pipal tale ke bhutne ki shaitan ki qasam

han phir to kahiyo hae wo kis tarah hue ghazab

insha na chher mujh ko miri jan ki qasam