مِری نوا سے ہُوئے زندہ عارف و عامی

مِری نوا سے ہُوئے زندہ عارف و عامی

دیا ہے مَیں نے انھیں ذوقِ آتش آشامی

حرم کے پاس کوئی اعجمی ہے زمزمہ سنج

کہ تار تار ہُوئے جامہ ہائے احرامی

حقیقتِ اَبدی ہے مقامِ شبیّری

بدلتے رہتے ہیں اندازِ کوفی و شامی

مجھے یہ ڈر ہے مُقامِر ہیں پُختہ کار بہت

نہ رنگ لائے کہیں تیرے ہاتھ کی خامی

عجب نہیں کہ مسلماں کو پھر عطا کر دیں

شکوہِ سنجر و فقرِ جنیدؒ و بسطامیؒ

قبائے علم و ہُنر لُطفِ خاص ہے، ورنہ

تری نگاہ میں تھی میری ناخوش اندامی!

miri nawa se hue zinda arif-o-ami

diya hai main ne unhen zauq-e-atish ashami

haram ke pas koi aajami hai zamzama sanj

ke tar tar hue jama ha-e-ehrami

haqiqat-e-abadi hai maqam-e-shabbiri

badalte rahte hain andaz-e-kufi-o-shami

mujhe ye dar hai muqamir hain pukhta kar bahut

na rang lae kahin tere hath ki khami

ajab nahin ke musalman ko phir ata kar den

shikwa-e-sunjarr-o-faqr-e-jinyad-o-bastammi

qaba-e-ilm-o-hunar lutf-e-khas hai, warna

tiri nigah mein thi meri nakhush andami!