مرثیہ بال گنگا دھر تلک

موت نے رات کے پردے میں کیا کیسا وار

روشنئ صبح وطن کی ہے کہ ماتم کا غبار

معرکہ سرد ہے سویا ہے وطن کا سردار

طنطنہ شیر کا باقی نہیں سونا ہے کچھار

بیکسی چھاتی ہے تقدیر پھری جاتی ہے

قوم کے ہاتھ سے تلوار گری جاتی ہے

اٹھ گیا دولت ناموس وطن کا وارث

قوم مرحوم کے اعزاز کہن کا وارث

جاں نثار ازلی شیر دکن کا وارث

پیشواؤں کے گرجتے ہوئے رن کا وارث

تھی سمائی ہوئی پونا کی بہار آنکھوں میں

آخری دور کا باقی تھا خمار آنکھوں میں

موت مہراشٹ کی تھی یا تری مرنے کی خبر

مردنی چھا گئی انسان تو کیا پتھر پر

پتیاں جھک گئیں مرجھا گئے صحرا کے شجر

رہ گئے جوش میں بہتے ہوئے دریا تھم کر

سرد و شاداب ہوا رک گئی کہساروں کی

روشنی گھٹ گئی دو چار گھڑی تاروں کی

تھا نگہبان وطن دبدبۂ عام ترا

نہ ڈگیں پاؤں پہ تھا قوم کو پیغام

دل رقیبوں کے لرزتے تھے یہ تھا کام تیرا

نیند سے چونک پڑے سن جو لیا نام تیرا

یاد کر کے تجھے مظلوم وطن روئیں گے

بندۂ رسم جفا چین سے اب سوئیں گے

زندگی تیری بہار چمنستان وفا

آبرو تیرے لئے قوم سے پیمان وفا

عاشق نام وطن کشتہ ارمان وفا

مرد میدان وفا جسم وفا جان وفا

ہو گئی نذر وطن ہستئ فانی تیری

نہ تو پیری رہی تیری نہ جوانی تیری

اوج ہمت پہ رہا تیری وفا کا خورشید

موت کے خوف پہ غالب رہی خدمت کی امید

بن گیا قید کا فرمان بھی راحت کی نوید

ہوئے تاریکیٔ زنداں میں ترے بال سپید

پھر رہا ہے مری نظروں میں سراپا تیرا

آہ و قید ستم اور بڑھاپا تیرا

معجزہ اشک محبت کا دکھایا تو نے

ایک قطرہ سے یہ طوفان اٹھایا تو نے

ملک کو ہستی بیدار بنایا تو نے

جذبۂ قوم کو جادو کو جگایا تو نے

اک تڑپ آ گئی سوتے ہوئے ارمانوں میں

بجلیاں کوند گئیں قوم کے ویرانوں میں

لاش کو تیری سنواریں نہ رفیقان کہن

ہو جبیں کے لئے صندل کی جگہ خاک وطن

تر ہوا ہے جو شہیدوں کے لہو سے دامن

دیں اسی کا تجھے پنجاب کے مظلوم کفن

شور ماتم نہ ہو جھنکار ہو زنجیروں کی

چاہیے قوم کے بھیشم کو چتا تیروں کی

maut ne rat ke parde mein kiya kaisa war

raushni-e-subh-e-watan ki hai ke matam ka ghubar

marka sard hai soya hai watan ka sardar

tantana sher ka baqi nahin sona hai kachhar

bekasi chhati hai taqdir phiri jati hai

qaum ke hath se talwar giri jati hai

uth gaya daulat-e-namus-e-watan ka waris

qaum marhum ke ezaz kuhan ka waris

jan nisar-e-azali sher dakan ka waris

peshwaon ke garajte hue ran ka waris

thi samai hui pauna ki bahar ankhon mein

akhiri dur ka baqi tha khumar ankhon mein

maut mehrisht ki thi ya tiri marne ki khabar

murdani chha gai insan to kya patthar par

pattiyan jhuk gain murjha gae sahra ke shajar

rah gae josh mein bahte hue dariya tham kar

sard-o-shadab hua ruk gai kohsaron ki

raushni ghut gai do char ghari taron ki

tha nigahban-e-watan dabdaba-e-am tira

na dagen paon pe tha qaum ko paigham

dil raqibon ke larazte the ye tha kam tera

nind se chaunk pare sun jo liya nam tera

yad kar ke tujhe mazlum watan roenge

banda-e-rasm-e-jafa chain se ab soenge

zindagi teri bahar-e-chamanistan-e-wafa

abru tere liye qaum se paiman-e-wafa

ashiq-e-nam-e-watan kushta arman-e-wafa

mard-e-maidan-e-wafa jism-e-wafa jan-e-wafa

ho gai nazr-e-watan hasti-e-fani teri

na to piri rahi teri na jawani teri

auj-e-himmat pe raha teri wafa ka khurshid

maut ke khauf pe ghalib rahi khidmat ki umid

ban gaya qaid ka farman bhi rahat ki nawed

hue tariki-e-zindan mein tire bal saped

phir raha hai miri nazron mein sarapa tera

ah-o-qaid-e-sitam aur burhapa tera

mojiza ashk-e-mohabbat ka dikhaya tu ne

ek qatra se ye tufan uthaya tu ne

mulk ko hasti-e-bedar banaya tu ne

jazba-e-qaum ko jadu ko jagaya tu ne

ik tarap a gai sote hue armanon mein

bijliyan kaund gain qaum ke wiranon mein

lash ko teri sanwaren na rafiqan-e-kuhan

ho jabin ke liye sandal ki jagah khak-e-watan

tar hua hai jo shahidon ke lahu se daman

den usi ka tujhe panjab ke mazlum kafan

shor-e-matam na ho jhankar ho zanjiron ki

chahiye qaum ke bhisham ko chita tiron ki