مرد بزرگ

اُس کی نفرت بھی عمیق، اُس کی محبّت بھی عمیق

قہر بھی اُس کا ہے اللہ کے بندوں پہ شفیق

پرورش پاتا ہے تقلید کی تاریکی میں

ہے مگر اُس کی طبیعت کا تقاضا تخلیق

انجمن میں بھی میَسّر رہی خلوَت اُس کو

شمعِ محفل کی طرح سب سے جُدا، سب کا رفیق

مثلِ خورشیدِ سحَر فکر کی تابانی میں

بات میں سادہ و آزادہ، معانی میں دقیق

اُس کا اندازِ نظر اپنے زمانے سے جُدا

اُس کے احوال سے محرم نہیں پیرانِ طریق

us ki nafrat bhi amiq, us ki mohabbat bhi amiq

qahr bhi us ka hai allah ke bandon pe shafiq

parwarish pata hai taqlid ki tariki mein

hai magar us ki tabiat ka taqaza takhliq

anjuman mein bhi muyassar rahi khalwat us ko

sham-e-mahfil ki tarah sab se juda, sab ka rafiq

misl-e-khurshid-e-sahar fikr ki tabani mein

bat mein sada-o-azada, maani mein daqiq

us ka andaz-e-nazar apne zamane se juda

us ke ahwal se mahram nahin piran-e-tariq