مسولینی

کیا زمانے سے نرالا ہے مسولینی کا جُرم!

بے محل بِگڑا ہے معصومانِ یورپ کا مزاج

مَیں پھٹکتا ہُوں تو چھَلنی کو بُرا لگتا ہے کیوں

ہیں سبھی تہذیب کے اوزار! تُو چھَلنی، مَیں چھاج

میرے سودائے مُلوکیّت کو ٹھُکراتے ہو تم

تم نے کیا توڑے نہیں کمزور قوموں کے زُجاج؟

یہ عجائب شعبدے کس کی مُلوکیّت کے ہیں

راجدھانی ہے، مگر باقی نہ راجا ہے نہ راج

آلِ سِیزر چوبِ نَے کی آبیاری میں رہے

اور تم دُنیا کے بنجر بھی نہ چھوڑو بے خراج!

تم نے لُوٹے بے نوا صحرا نشینوں کے خیام

تم نے لُوٹی کِشتِ دہقاں، تم نے لُوٹے تخت و تاج

پردۂ تہذیب میں غارت گری، آدم کُشی

کل رَوا رکھّی تھی تم نے، مَیں رَوا رکھتا ہوں آج!

kya zamane se nirala hai misoleni ka jurm!

be mahal bigra hai maasuman-e-yorap ka mizaj

main phatkata hun to chhalni ko bura lagta hai kyun

hain sabhi tahzib ke auzar! tu chhalni, main chhaj

mere sauda-e-mulukiyyat ko thukrate ho tum

tum ne kya tore nahin kamzor qaumon ke zujaj?

ye ajaib shobade kis ki mulukiyyat ke hain

rajdhani hai, magar baqi na raja hai na raj

al-e-sizar chob-e-nai ki abiyari mein rahe

aur tum duniya ke banjar bhi na chhoro be khiraj!

tum ne lute be nawa sahra nashinon ke khayyam

tum ne luti kisht-e-dehqan, tum ne lute takht-o-taj

parda-e-tahzib mein gharat giri, adam kushi

kal rawa rakhi thi tum ne, main rawa rakhta hun aj!