Arooz is now on the App Store, for iPhone and iPad. Download →

All poetry

مسعود مرحوم

Allama Iqbal (1877–1938)

یہ مہر و مہ، یہ ستارے یہ آسمانِ کبود

کسے خبر کہ یہ عالم عدَم ہے یا کہ وجود

خیالِ جادہ و منزل فسانہ و افسوں

کہ زندگی ہے سراپا رحیلِ بے مقصود

رہی نہ آہ، زمانے کے ہاتھ سے باقی

وہ یادگارِ کمالاتِ احمد و محمود

زوالِ علم و ہُنر مرگِ ناگہاں اُس کی

وہ کارواں کا متاعِ گراں بہا مسعود!

مجھے رُلاتی ہے اہلِ جہاں کی بیدردی

فغانِ مُرغِ سحَر خواں کو جانتے ہیں سرود

نہ کہہ کہ صبر میں پِنہاں ہے چارۂ غمِ دوست

نہ کہہ کہ صبر معمّائے موت کی ہے کشود

“دلے کہ عاشق و صابر بود مگر سنگ است

ز عشق تا بہ صبوری ہزار فرسنگ است”

نہ مجھ سے پُوچھ کہ عمرِ گریز پا کیا ہے

کسے خبر کہ یہ نیرنگ و سیمیا کیا ہے

ہُوا جو خاک سے پیدا، وہ خاک میں مستور

مگر یہ غَیبتِ صغریٰ ہے یا فنا، کیا ہے!

غبار راہ کو بخشا گیا ہے ذوقِ جمال

خِرد بتا نہیں سکتی کہ مُدّعا کیا ہے

دِل و نظر بھی اسی آب و گِل کے ہیں اعجاز

نہیں تو حضرتِ انساں کی انتہا کیا ہے؟

جہاں کی رُوحِ رواں ’لا اِلٰہَ اِلّا ھُوْ،

مسیح و میخ و چلیپا، یہ ماجرا کیا ہے!

قصاص خُونِ تمنّا کا مانگیے کس سے

گُناہ گار ہے کون، اور خُوں بہا کیا ہے

غمیں مشو کہ بہ بندِ جہاں گرفتاریم

طلسم ہا شکنَد آں دلے کہ ما داریم

خودی ہے زندہ تو ہے موت اک مقامِ حیات

کہ عشق موت سے کرتا ہے امتحانِ ثبات

خودی ہے زندہ تو دریا ہے بے کرانہ ترا

ترے فراق میں مُضطر ہے موجِ نیل و فرات

خودی ہے مُردہ تو مانندِ کاہ پیشِ نسیم

خودی ہے زندہ تو سلطانِ جملہ موجودات

نگاہ ایک تجلّی سے ہے اگر محروم

دو صد ہزار تجلّی تلافیِ مافات

مقام بندۂ مومن کا ہے ورائے سپہر

زمیں سے تا بہ ثُریّا تمام لات و منات

حریمِ ذات ہے اس کا نشیمنِ ابدی

نہ تِیرہ خاکِ لحدَ ہے، نہ جلوہ گاہِ صفات

خود آگہاں کہ ازیں خاک داں بروں جَستند

طلسمِ مہر و سِپہر و ستارہ بشکستند