مزے لوں درد کے میں تھوڑے تھوڑے ظلم سہ سہ کر

مزے لوں درد کے میں تھوڑے تھوڑے ظلم سہ سہ کر

ستم کیجے تو تھم تھم کر جفا کیجے تو رہ رہ کر

ملے تھے آج مدت میں بہت روئے بہت تڑپے

وہ درد عشق سن سن کر ہم اپنا درد کہہ کہہ کر

ہوئی ہے شمع محفل تو شریک گریۂ عاشق

تجھے اے قلقل مینا کہا تھا کس نے قہہ قہہ کر

چھپایا زلف نے چہرہ تو شوخی نے کیا ظاہر

ہزاروں بار نکلا وصل کی شب چاند گہہ گہہ کر

تڑپنے میں مزہ آتا ہے اس کم بخت کے ہم کو

اگر دل یاس سے بیٹھا ابھارا ہم نے کہہ کہہ کر

یہ جانا تھا نہ آئیں گے تو کیوں جانے دیا ان کو

یہی اے داغؔ پچھتاوا مجھے آتا ہے رہ رہ کر

maze lun dard ke main thore thore zulm sah sah kar

sitam kije to tham tham kar jafa kije to rah rah kar

mile the aj muddat mein bahut roe bahut tarpe

wo dard-e-ishq sun sun kar ham apna dard kah kah kar

hui hai sham-e-mahfil to sharik-e-girya-e-ashiq

tujhe ai qulqul-e-mina kaha tha kis ne qaha qaha kar

chhupaya zulf ne chehra to shokhi ne kiya zahir

hazaron bar nikla wasl ki shab chand gah gah kar

tarapne mein maza ata hai is kam bakht ke ham ko

agar dil yas se baitha ubhara ham ne kah kah kar

ye jana tha na aenge to kyun jane diya un ko

yahi ai dagh pachhtawa mujhe ata hai rah rah kar