مستقبل

آنے والا ہے بہت جلد ایک ایسا عہد بھی

دہر کے حالات موجود فنا ہو جائیں گے

اور ہی ہو جائیں گے کچھ یہ زمین و آسماں

اور ہی کچھ روز و شب صبح و مسا ہو جائیں گے

رفعتوں پر ہر طرف چھا جائے گا ضعف و جمود

عرش والے مائل تحت الثریٰ ہو جائیں گے

پستیاں کر لیں گی طے سارے مقامات فراز

خاک کے ذرے ثریا تک رسا ہو جائیں گے

عظمت و ذلت کا سارا امتیاز اٹھ جائے گا

ایک منزل میں شہنشاہ و گدا ہو جائیں گے

خاک میں مل جائے گا سرمایہ داروں کا غرور

اہل نخوت راہئ ملک فنا ہو جائیں گے

فقر و فاقہ کی جگہ لے لیں گے اطمینان و عیش

مفلس و مزدور آزاد بلا ہو جائیں گے

صفحۂ ہستی سے مٹ جائے گا نام ظلم و جبر

اہل استبداد سب بے دست و پا جائیں گے

حاکم و محکوم میں باقی نہ ہوگا کوئی فرق

ایک اہل تخت و اہل بوریا ہو جائیں گے

منہدم ہو جائے گا دیوار زنداں خودبخود

اہل زنداں قید محنت سے رہا ہو جائیں گے

ٹوٹ جائیں گی قفس کی تیلیاں اک آن میں

چہچہوں سے بوستاں رنگیں نوا جو جائیں گے

ane wala hai bahut jald ek aisa ahd bhi

dahr ke halat maujud-e-fana ho jaenge

aur hi ho jaenge kuchh ye zamin-o-asman

aur hi kuchh roz-o-shab subh-o-masa ho jaenge

rifaton par har taraf chha jaega zof-o-jumud

arsh wale mail-e-taht alssari ho jaenge

pastiyan kar lengi tai sare maqamat-e-faraz

khak ke zarre surayya tak rasa ho jaenge

azmat-o-zillat ka sara imtiyaz uth jaega

ek manzil mein shahanshah-o-gada ho jaenge

khak mein mil jaega sarmaya daron ka ghurur

ahl-e-nakhwat rahi-e-mulk-e-fana ho jaenge

faqr-o-faqa ki jagah le lenge itminan-o-aish

muflis-o-mazdur azad-e-bala ho jaenge

safha-e-hasti se mit jaega nam-e-zulm-o-jabr

ahl-e-istibdad sab be dast-o-pa jaenge

hakim-o-mahkum mein baqi na hoga koi farq

ek ahl-e-takht-o-ahl-e-boriya ho jaenge

munhadim ho jaega diwar-e-zindan khudbakhud

ahl-e-zindan qaid-e-mehnat se raha ho jaenge

tut jaengi qafas ki teliyan ik an mein

chahchahon se bostan rangin nawa jo jaenge