مزا بے ہوشیٔ الفت کا ہوشیاروں سے مت پوچھو

مزا بے ہوشیٔ الفت کا ہوشیاروں سے مت پوچھو

عزیزاں خواب کی لذت کو بے داروں سے مت پوچھو

ہمیں کچھ دخل ان باتوں میں سنتے ہو نہیں مطلق

حقیقت بے وفائی کی وفاداروں سے مت پوچھو

جو پوچھو تو عزیزاں دل سے پوچھو یا کہ تم ہم سے

ہماری اور اس کی بات اغیاروں سے مت پوچھو

گئے وے دن جو رہتے تھے جہاں آباد میں ہم بھی

خرابی شہر کی صحرا کے آواروں سے مت پوچھو

گلوں کو کب خبر ہے حال زار عندلیبوں سے

حقیقت مفلسوں کی آہ زر داروں سے مت پوچھو

وہ دل رکھتے ہیں اپنا پاس اپنے بلکہ غیروں کا

حقیقت بے دلوں کی آہ دل داروں سے مت پوچھو

خبر دل کی اگرچہ ہو مرے اشکوں سے تم سن لو

یہ واقف خوب ہیں اس گھر سے ہرکاروں سے مت پوچھو

انھوں کا جل رہا ہے دل خدا جانے کہ کیا بولیں

مرا احوال کوئی میرے غم خواروں سے مت پوچھو

یہ اپنے حال ہی میں مست ہیں ان کو کسی سے کیا

خبر دنیا وما فیہا کی مے خواروں سے مت پوچھو

ہوا ہے ان دنوں وہ آشناؤں سے بھی بیگانہ

خرابی کو حسنؔ کی آج کل یاروں سے مت پوچھو

maza be hoshi-e-ulfat ka hoshyaron se mat puchho

azizan khwab ki lazzat ko be daron se mat puchho

hamen kuchh dakhl in baton mein sunte ho nahin mutlaq

haqiqat be wafai ki wafadaron se mat puchho

jo puchho to azizan dil se puchho ya ke tum ham se

hamari aur us ki bat aghyaron se mat puchho

gae we din jo rahte the jahan abad mein ham bhi

kharabi shahr ki sahra ke awaron se mat puchho

gulon ko kab khabar hai hal-e-zar-e-andalibon se

haqiqat muflison ki ah zar daron se mat puchho

wo dil rakhte hain apna pas apne balke ghairon ka

haqiqat be dilon ki ah dil daron se mat puchho

khabar dil ki agarche ho mire ashkon se tum sun lo

ye waqif khub hain is ghar se harkaron se mat puchho

inhon ka jal raha hai dil khuda jane ke kya bolen

mira ahwal koi mere gham khwaron se mat puchho

ye apne hal hi mein mast hain un ko kisi se kya

khabar duniya wama fiha ki mai khwaron se mat puchho

hua hai in dinon wo ashnaon se bhi begana

kharabi ko husn ki aj kal yaron se mat puchho