مستی کے پھر آ گئے زمانے

مستی کے پھر آ گئے زمانے

آباد ہوئے شراب خانے

ہر پھول چمن میں زر بہ کف ہے

بانٹے ہیں بہار نے خزانے

سب ہنس پڑے کھلکھلا کے غنچے

چھیڑا جو لطیفہ صبا نے

سر سبز ہوا نہالِ غم بھی

پیدا وہ اثر کیا ہوا نے

رندوں نے پچھاڑ کر پلا دی

واعظ کے نہ چل سکے بہانے

کر دوں گا میں ہر ولی کو میخوار

توفیق جو دی مجھے خدا نے

ہم نے تو نثار کر دیا دل

اب جانے وہ شوخ یا نہ جانے

بیگانۂ مئے کیا ہے مجھ کو

ساقی کی نگاہِ آشنا نے

مسکن ہے قفس میں بُلبلوں کا

ویراں پڑے ہیں آشیانے

اب کاہے کو آئیں گے وہ حسرتؔ

آغازِ جنوں کے پھر زمانے

masti ke phir a gae zamane

abad hue sharab khane

har phul chaman mein zar ba kaf hai

bante hain bahar ne khazane

sab hans pare khulkhula ke ghunche

chhera jo latifa saba ne

sar sabz hua nihal-e-gham bhi

paida wo asar kya hawa ne

rindon ne pichhar kar pila di

waiz ke na chal sake bahane

kar dunga mein har wali ko maikhwar

taufiq jo di mujhe khuda ne

ham ne to nisar kar diya dil

ab jane wo shokh ya na jane

begana-e-mai kya hai mujh ko

saqi ki nigah-e-ashna ne

maskan hai qafas mein bulbulon ka

wiran pare hain ashiyane

ab kahe ko aenge wo hasrat

aghaz-e-junun ke phir zamane